ARON malikayan ang paggasto sa di importante nga mga butang nga pangayuon sa mga barangay gikan sa Probinsya, gilaraw ni Gobernador Gwendolyn Garcia pag-umol og bag-o nga lista sa mga rekisitos o guidelines sa kon unsa ang pwede nga pangayuon sa matag barangay o lungsod.
Kini human nasuta sa gobernador nga matag tuig, kanunay mangayo ang mga barangay og kahimanan sama sa mga monoblock, tent, medals, computers, foot path ug uban pa, nga alang niya di kinahanglan.
“This is my pronouncement now, I will come up with set of guidelines, unsa ra atong pwede matabang sa mga barangay kay nakit-an nako in the past, bisan unsa nalang ang pangayuon, gikan sa bola ngadtos medalya, uniporme. Kuwang na lang mangayo og singsing”, matod ni Garcia niadtong Disyembre 2, 2019.
Gawas sa mga barangay, matod niya nga may mga non-government organization (NGO) nga nagsigi og pangayo sa Probinsya ug way insakto nga lista o audit sa gigastohan.
“Karon, ako nang gipaimbentaryo. Wa nay manubag og hain na ni napunta. Ako giingnan sila, well, don’t worry, I’ll come up with set of guidelines that will ensure accountability, transparency and most of all that will ensure the efficient use of our resources. Dili kay gasto, kay gasto lang ta bisan unsa nalang kay modagan ta og posisyon”, matod ni Garcia. (ANV)