MAAYONG adlaw sa tanang nagasunod sa atong pahina matag Huwebes dinhi sa SuperBalita Davao.
Naapil ba mo sa kalibog sa mga balita sa dagkong mga network sa television sa atong nasud mahitungod sa pag-host sa atong nasud sa 30th Southeast Asian (SEA) Games?
Nagkadaiyang isyu ang gisabwag sa katawhan aron mahimong maut ang dagway sa atong nasud, palpak ang pagpadagan sa SEA Games ug gisugdan pagkondisyon ang hunahuna sa katawhan nga nabulit sa kurapsyon ang mga kalihukan niini.
Ang nakaparat kay ang pagbatikus gisugdan man sa atong kaparihong mga Pinoy nga naa sa industriya sa telebisyon ug mga pamantalaan. Ang gipakita sa katawhan dili mao ang matuod nga giandam alang sa pagpakita sa abilidad sa mga Pinoy ug ang kinaiya sa pagkamaabiabihon.
Ang gibalita sa katawhan mao ang mga langyaw nga mga atleta nga napugos pagkatulog sa salog kay walay naandam nga hustong dapit aron ilang mahigdaan sa ilang pagpahulay human miabot sa atong nasud.
Dunay mipagawas sa balita nga kunohay mibati’g kabalaka kay maulawan ang atong nasud kay gipakaon lang og kikiam, rice ug itlog ang mga sakop sa Women’s Football team apan kon imong palawman ang imong pagtimbang-timbang, magduda ka nga dunay lahi nga motibo nga mao ang pagpakaulaw sa kagamhanan.
Ang kahimtang sa mga atleta nga wa mahatagan og insakto nga pagtagad nasinati sab sa atong mga atleta nga taga Davao panahon sa ilang pag adto aron makigtigi sa Palarong Pambansa didto sa Antique, probinsiya sa Ilo-ilo nga nanghigda ra sila sa mga karton.
Sala sa host? Ang tubag dili kay nag una-una man sila pag adto pipila ka adlaw sa gitakda nga pagdawat sa mga atleta. Mao sab ang nahitabo karon sa Sea Games kay nag-una pag-abot ang mga atleta sa gitakda nga arrival apan wala kini gipasabot sa mga sakop sa media nga nagpagawas sa mga balita.
Ang dapit diin kunohay ipahigayon ang press conference ug Media Center, blackboard lang ug mga listahan ang naa ug wa sab press conference nga nahitabo kay wala man sa official nga schedule sa programa.
Sa gipakita sa mga social media nga hulagway, usa ka world class nga media center ang giandam alang sa mga magsusulat ug magsisibya nga mo-cover sa Sea Games.
Kung atong hunahunaon usa kini ka international nga event ug daghan ang gusto motan-aw kay kasagaran raba sa mga event nindot kaayo ang pagpangandam sa mga host alang sa opening kay mao kini ang nagadala sa una nga impresyon sa mga tumatan-aw apil ang mga bisitang langyaw.
Mas maayo unta nga magkahiusa ang mga Pinoy pagsuporta sa kalihukan apan unsaon nga Pinoy raman gihapon ang mangunay paghugno sa maayong tumong nga kita untang tanan ang mabulahan.