TINGKAGOL sa prisohan ang magsuon human nasikop atol sa gilusad nga drug bust sa Toril Police Station niadtong Martes, Disyembre 3.
Mga suspek mao sila Carlos ug Louie Danao nga taga Purok 12, Barangay Mintal, Tugbok District, Davao City.
Sumala ni police chief Lieutenant Colonel Jed Clamor, hepe sa Toril Police Station, nga nakadawat sila og impormasyon labot sa ilegal nga hinimoan sa magsuon.
Gilayong gilusad ang test buy aron maseguro nga nagabaligya ba gayod sila diin human sa transaksiyon gilayong gilusad ang drug bust.
Onse sa mga pakite sa gituohang shabu ang nakuha sa posisyon sa mga dinakpan, marked money ug cellphone nga maoy gihimong komunikasyon sa nagtakuban nga pulis.
Dugang ni Clamor nga maningkamot sila nga mamahimong drug-free ang mga barangay sa Toril District.
Mga nahisgutan gipangbalhog sa selda sa Toril PNP samtang giandam na ang kaso nga ipasaka kanila didto sa korte. (Jeepy P. Compio)