GINAMA sa malata nga kagamitan ang motorela nga nikampyeon sa Paskorela 2019 niadtong Lunes, Disyembre 2, sa Divisoria, siyudad sa Cagayan de Oro.
Ang nidaug nga motorela mao ang Number 7 nga gipanag-iyahan ni Elma Abao diin numero sa operation permit nga 0499 ug dunay numero nga KW 9648.
Dunay premyo nga P50,000 ug trophy alang sa kampyeon. Gisundan usab kini sa motorela nga Number 10 nga nakadawat og P30,000 lakip na trophy, ug ikatulo nga mananaog mao ang Number 1 diin nakadawat usab og P20,000 ug trophy.
Samtang tanang wala gipalad dunay consolation prize nga tag P3,000 matag-usa.
Gibutyag sa designer nga si Rene Sabanpan, kinsa ika-lima na ka tuig nga maoy nidaog, nga kanunay kining dunay bag-ong ideya sa paskorela tungod na usab kay matag tuig daghang kabag-ohan nga iyang ginahimo.
"Siyempre, once mo join ka og competition you must have good ideas, good innovation. Tapos dapat creative ka kay ang competition laro ni siya sa imong ideas ug imong concept," matud ni Sabanpan.
Nasayran nga usa ka semana ug upat ka adlaw niya kining gihagoan ug ginama kini sa biodegradable sama sa pakaw sa mais.
"Recyclable materials gikan sa pakaw sa mais, all in all biodegradable," dugang pa.
Samtang mapasalamaton usab si Chedilyn Aissa Dulguime nga mapasalamaton kaayo sila kay pinakadaghang nisalmot nga motorela karong tuiga.
"Nalipay kami nga daghan ang nag-interest nga moapil karong tuiga sa atong Paskorela. Busa, amo pud gipaningkamotan nga medyo modako gamay ang atong premyo," matud ni Dulguime.
Nanghinaot usab kini nga mas modaghan pa ang moapil igka 2020 ug mas mapadak-an pa ang premyo.
Samtang sa marching band, dunay lima ka mga tunghaan ang nisalmot sama sa Camp Evangelista Elementary School, Agusan Elementary School, kampyeon ang North City Central Elementary School nga dunay premyo nga P30,000; Agusan Elementary School, P20,000; ug Puerto Elementary School, P10,000.
Samtang tag P2,000 ang gipanghatag sa wala nakadaug sama sa Dansolihon Elementary School ug Camp Evangelista Elementary School.