GISIGURO sa ahensiya kauban ang lokal nga kagamhanan sa siyudad nga nakasunod sa gabayan ang mga presyo sa mga Noche Buena products alang sa kasaulogan sa Pasko.
Anaa sa 12 ka mga patigayon ang gisusi sa Department of Trade and Industry (DTI) ug City Price Coordinating Council (CPCC) aron masuta ang mga presyo, samtang kauban usab ang Anti-African Swine Fever (ASF) ug City Veterinary Office ug uban pa aron nga masigurong luwas ang katawhan ilabi na sa padayong pagpatuman pagdili sa produktong baboy gikan sa Luzon nga makaabot sa siyudad ilabi na nga ang produktong baboy ang sagad sa Noche Buena
Gibutyag ni Concordia Acosta, officer-in-charge sa DTI, nga sukad sa ilang monitoring, gapatuman man ang mga patigayon sa siyudad.
"So far, mga buotan man ang atong establishments diri, ga-abide sila. Ato ganing nakita lower pa ilang presyo. Nakita nato nga wala'y nitaas, mostly lower," matud ni Acosta.
Nagpahimangno usab kini sa mga konsumante nga magmaigmat diha sa pagpalit ug mas maayong nasayod sa mga Suggested Retail Price (SRP) ug itaho dayon sa DTI kung dunay makitang mga nakalapas niini.
Samtang nagpasalamaton usab si abogado Edgardo Egay Uy, co-chair sa CPCC, nga angayang sutaon ang mga presyo base sa SRP nga gipagawas sa DTI.
"We will be able to inform the public nga mao ning SRP. Mopalit kamo ani nga mga establishments, bisan asa nga establishments nga applicable ang SRP nga mao ra gyud ang SRP nga inyong bayaran," matud ni Uy.
"Dapat naka tag price ang SRP," dugang pa.
Mapasalamaton usab ang CPCC tungod kay wala pay natalang nakalapas nga mga patigayon sukad sa ilang pagsusi ug sa pagsulat niini nga balita.