GIPAMUGOS sa usa ka lalaki nga wala kini nagbaligya og pekeng kwarta apan giingong gisugo lang sa iyang kaila nga magprinta og aron pamasko.
Anaa sa 55 ka pekeng tag usa ka libo o P55,000 fake money ang nakuha sa kapulisan gikan sa encoder human napalitan og pekeng kwarta mga alas 2:40 sa kadlawon, Miyerkules, Disyembre 4, diha sa atubangan sa Miranda Bldg., Chavez St., Barangay 3, siyudad sa Cagayan de Oro.
Nasikop si John Nathaniel Lopez alyas Tonix, 35, ulitawo, ug computer encoder kinsa residente sa Xavier Ecovill, Barangay Lumbia.
Sa impormasiyon gikan sa kapulisan sa Police Station 3 (PS3) sa Agora, gikabutyag nga positibong napalitan sa pekeng kwarta ang suspek.
Giingong nakadawat sila og taho kalabot na sa pekeng kwarta nga ginabaligya diin ang usa ka libo (anaa lang sa kantidad nga P150 hangtod P200.
Gani, napalitan na kini sa ilang gihimong test buy niadtong Dominggo, Disyembre 1, ug gipasusi kini sa tinugyanan sa Bangko Sentral ng Pilipinas (BSP), hinungdan nga nasutang peke ang maong kwarta rason nga nagpahigayon og buy-bust batok sa maong suspek.
Gibutyag ni Lopez nga gisugo lamang kini sa kaila nga si alyas Toper, kinsa kanhi gihapon priso ug giingong nagpatabang kaniya alang sa pamasko.
"Naa'y nagpa-print sa ako. Nangayo siya og tabang ba kay pamasko daw niya. Wala ko kabalo kung asa niya gamiton," matud niini.
Hugot usab nga gipanghimakak sa suspek ang alegasiyon nga gabaligya kini tungod na usab kay nasayod man nga ilegal ang maong binuhatan.
"Wala gyud koy plano mo himo kay kabalo man ko nga bawal na iya kung gipugos. Wala ko namaligya lage ana. Wala ko nagpabayad sa iya bisag piso," matud ni Lopez.
Ang suspek ang kasamtangang nagtingkagol na sa bilanggoan alang sa tukmang kaso.