GIKUSTODIYA sa Bureau of Fisheries and Aquatic Resources (BFAR)-Northern Mindanao ang mga nakumpiskang 8,000 kilo nga taklubo sa Koresco checkpoint, Masterson Avenue, Barangay Lumbia, siyudad sa Cagayan de Oro.
Onse usab ka mga suspek ang nasikop kinsa nailang sila si Christopher Pornia, 28, taga Poblacion, Quezon, Bukidnon; Ricky L. Sunogan, 50, residente sa Manticao, Misamis Oriental; Larry T. Salvan, 45, residente sa Opol, Misamis Oriental; Diosdado Abellana, 29, residente sa Barangay Mambuaya, Cagayan de Oro City; Arnel Sanchez, 49, residente sa Laguindingan, Misamis Oriental; Peterson Suan, 55, residente sa Manticao, Misamis Oriental; Ricky Allones, 35, residente sa Tagoloan, Misamis Oriental; Jed Ragmac, 29, residente sa Initao, Misamis Oriental; Ramil Villagracia, 19, residente sa Tagoloan, Misamis Oriental; Ronel Pilarca, 30, residente sa Valencia, Bukidnon; ug Michael Paler, 24, taga Initao, Misamis Oriental.
Sa nahipos nga impormasiyon gikan sa kapulisan sa City Mobile Force Company-Cagayan de Oro Police Office (CMFC-Cocpo) sa pagpangulo ni Police Lieutenant Colonel Alexy Sonido, nakumpiska ang maong mga giant clam shells kon taklubo atol sa checkpoint alas 4:30 sa kaadlawon niadtong Martes, Disyembre 3.
Nasuta nga ang mga taklubo ang sulod sa usa ka Fuso wing van truck nga nagdala sa numero sa plaka nga NCK 6892 ug nakarehistro sa usa ka Precily Catigum Ceniza nga taga Tagoloan, Misamis Oriental.
Si Allan Poquita, regional director sa BFAR, miingon nga endangered species kini ug angayang dili hilabtan tungod kay dakong kalapasan ang pagkuha niini.
"That's one of the identified endangered species, so ginadili gyud na siya sa pagkuha," matud ni Poquita.
Gidugang pa niini nga dili gyud kini mamahimong legal tungod kay educational purposes lang ang pwede motan-aw niini, apan dili kini mamahimong kuhaon sa dagat.
Gani, napungot kini tungod kay dunay mga gagamit og mga ngalan nga gi-otorisa na kini sa Presidente o di ba kaha sa BFAR.
"No, the only exception of the law is for research purposes. Pero dili pud pwedi kuhaon sa dagat. Tan-awon lang," matud ni Poquita.
Gituohang gikan sa bukid ang maong mga taklubo nga gikubkob, apan alang sa BFAR, basta makitang itapok na, kini gikan gyud sa dagat.
"Maybe million years ago, dagat pa na dihang dapita naa'y mga taklubo. Natabunan lang sa yuta, mao ng na fossilized na siya. Pero our assumption basta itapok na gikan sa dagat," dugang niini.
Gibutyag sa BFAR nga dunay mga susama usab niini o mga taklubo sa kadagatang bahin dinhi sa Northern Mindanao.
Gikabutyag nga subay sa mga suspek, ibaligya kini tungod na usab kay himuon nga tiles, gam-on og isagol sa medisina o tambal ug uban pa.
Samtang anaa sa dili moubos sa P200,000 hangtod sa P2,000,000 ang multa sa nakalapas niini ug pagkabilanggo sa walo hangtod 10 ka tuig.
Gidugang pa ni Poquita nga dili kini ang unang higayon nga dunay nasikop nga susama niini dinhi sa Northern Mindanao, gani dunay nasikop na sa Misamis Occidental nga anaa sa 100,000 kilo.
Posibleng dugmukon ang maong mga nakumpiska nga mga taklubo susama kaniadto sa gihimo niini sa dihang RD pa sa Central Visayas sa Cebu ug gipasaksihan sa barangay officials.
Apan, karon nagpaabot pa sila sa posisyon sa central office samtang ang mga suspek ang anaa sa Police Station 8 sa Barangay Lumbia.