NAKABSAN sa kinabuhi ang usa ka driver sa motorsiklo human nagsungag sa laing motorsiklo niadtong niaging adlaw sa Balangay 1A, lungsod sa Poblacion, Quezon, Bukidnon.
Ang insidente gilangkoban sa Euro Motors nga gimaneho ni Melgreg L. Pilapil, 36, residente sa Balangay 11 susamang lungsod, uban sa iyang mga backrider nga mao sila si Greg Pilapil, 10; Leah, 13; ug Melgie, 16, pulos residente sa dapit.
Samtang usa ka Hero nga motorsiklo gimaneho ni Rene Balwit, residente sa susamang lungsod.
Si Police Staff Sergeant Jhunrey Rasonabe sa Quezon Police Station nibutyag sa SunStar Superbalita Cagayan de Oro nga base sa imbestigasyon, nasuta nga kining gimaneho ni Pilapil padulong ngadto sa New Municipal Hall apan pagdangat ngadto sa dapit sa nahitaboan, kalit nga mitunga kining Hero nga motorsiklo, hinungdan sa maayong pagkabangga niini sa atubangan nga bahin.
Gumikan sa kusog nga impact, dili tiaw ang kadaot nga naangkon sa wala mailang driver ug ngadto sa mga biktima sa laing motorsiklo.
Grabe ang kadaot nga naangkon ni Balwit dihang gidala sa Maramag Provincial Hospital sa Bukidnon apan gideklarar nga dead on arrival, samtang si Melgreg ang na coma karong panahona ug pabiling anaa sa talandugon nga kondisyon.
Luwas sa makuyawng kahimtang ang anak ni Melgreg nga 10 anyos ug 16 anyos lakip ang igsuon niining 13 anyos.
Sa dugang pag-imbestigar sa kapulisan, si Balwit giingong lango sa ilimnong makahubog niadtong tungora, ug wala'y gikapakitang lisensya ug papeles sa motorsiklo.
Gitouhang adunay mahitabong settlement tali sa duha ka kampo.