GILUBONG sa Gilas Pilipinas og 52 puntos ang Singapore, 110-58, sa unang duwsa sa 2019 Southeast Asian Games basketball nga gipahigayon sa Mall of Asia Arena, Miyerkules, Disyembre 4.
Gilangkuban sa pulos PBA players, daw og sa giduwa-duwaan lang sa Gilas Pilipinas ang Singapore sa dihang nakasugod na kini pagbuylo sa sayong bahin sa first quarter.
Human maunhi, 0-2, sa sayong bahin, si Stanley Springle maoy mitali sa unang siete puntos sa Gilas nga gisundan usab dayon sa laing duha ka shot ni Christian Standhardinger ug gitapos ang unang period, 30-13.
Gikan niadto, walay puas nga mibunday og nagkutay nga rally ang mga Pinoy nga gani halos tanan nakatampo sa scoring department.
Si Troy Rosari nangulo sa Gilas nga may 15 puntos, walo ka rebounds ug tulo ka assists, samtang 14 usab ang naamot ni Vic Manuel.
Midugang og 13 si Matthew Wright nga gibuwakan og tulo ka tres, samtang ang Sugboanong si June Mar Fajardo mipaksit og 12 puntos, walo niini sa second half.
Sunod ikasangka sa Pilipinas ang Vietnam sa Biyernes, Disyembre 6, sa mao gihapong dapit.