NAKAABANTE sa semifinals round si Efren "Bata" Reyes ug ang women's team sa Philippine billiard sa nagpadayon nga Southeast Asian (SEA) Games human tagsatagsa nilang gipangpukan ang ilang mga kaatbang, Miyerkules, Disyembre 4.
Si Reyes yanong mipukan ni Thongchai Punyawee sa Thailand, 100-37, aron paglabni og lingkuranan alang sa sunod round sa one-cushion carom event nga gipahigayon sa Manila Hotel Tent.
Gipildi usab ni Chezka Centeno ang Thailander nga si Sukritthanes Waratthanun, 7-3, sa 10-ball singles aron usab makahulbot og luna sa semis.
Hinuon sa men's 9-ball doubles, pakyas ang Pilipinas nga makasulod sa finals human nangapukan ang mga bilyaristang Pinoy sa mga kamot sa Myanmar.
Si Warren Kiamco ug Jeffrey Ignacio wa makapahimulos sa ila untang labaw sa naghinapos nga bahin ug miyukbo sa kulbahinam nga sangka, 9-8, ngadto nila ni Thu Aung Moe ug Phone Myint Kyaw sa semifinals.
Nangapildi usab ang laing panagparis nila ni Carlo Biado ug Johann Chua ngadto sa taga Singapore nga sila si Toh Lian Han ug Yapp Aloysius sa Singapore, 9-3. (JBM)