SUBIC, Zambales -- Nakab-ot sa Philippine Team ang silver medal sa Mens Individual sa Laser Run Discipline sa Modern Pentathlon sa Southeast Asian Games 2019 sa Subic, Huwebes, Disyembre 5, 2019.
Si Samuel German, gikan sa Ormoc City, ang nakakuha sa ikaduhang pwesto sa Laser Run Mens Individual.
Nakaatbang ni German ang mga atleta gikan sa Indonesia, Thailand, Malaysia ug Singapore.
Sa pagsugod sa duwa, naulahi si German.
Apan wa magdugay, niabante sa ikaduha nga pwesto si German diin nag-una kaniya si Muhammad Taufik sa Indonesia ug nagsunod ni German si Marcus Ong sa Singapore.
Ang Laser Run kombinasyon sa dagan ug laser gun shooting.
Ang mga atleta una nga mo pusil og lima ka green lights nga magsilbing target sud sa 50 segundos.
Bawal sila mobiya sa pwesto kung di makumpleto pag-igo ang lima ka green lights samtang naa pay oras.
Bisan og wala nay oras pero wala pa sab nila nakumpleto pagpusil ang lima ka green lights, bawala gihapon sila mobiya.
Pero bisan og naa pay nahabilin nga oras unya nakumpleto na nila pag igo ang green lights, pwede na sila mo biya para mo dagan.
Ang mga atleta mo dagan og 800 metros sa una mo balik sa pagpusil.
Ka upat balik balikon sa mga atleta ang maong lumba.
Usa ka pagsuway ang nasugatan sa mga atleta sa tanan nasud ang grabeng kainit nga dali ra makaluya.
Matag nasud dunay duha ka atleta sa Laser Run Individual diin naka partner ni German si Michael Ver Anton Comaling.
Gikalipay ni Ormoc City Mayor Richard Gomez ang resulta kinsa misaksi ug mipakita sa iyang suporta sa mga atleta gikan sa Ormoc.
Mahinumdoman nga sa Ormoc City nagsugod ang Modern Pentathlon sa Pilipinas nga gisugdan sa paglingkod ni Gomez. (Superbalita Cebu)