SA PAGPANGUNA ni Police Regional Office (PRO)-Northern Mindanao Brigadier General Rolando B. Anduyan, ilang gilusad ang Higalang Pulis Mobile Library sa Sitio Limunsudan, Barangay Rogongon, Iligan City niadtong Disyembre 3, 2019.
Gipasabot ni Anduyan nga ang mobile library gi-attached sa patrol car kon asa daghang makeshift bookshelf ang gibutang sa likod sa sakyanan.
Duha ka mga pick-up ang gigamit sa kapolisan nga nagdala og mga libro, reading materials, educational supplies ug telebisyon nga haom sa edad sa mga bata nga magtoun.
Gitarget niini nga programa mao kadtong mga bata sa tunghaan, sa kadalanan sama sa out-of-school youth, aron makatabang kanila makakat-on ug basic nga kahibalo, maayong pamatasan ug paghigugma sa nasod ug responsableng individwal sa nasod ug pag-aghat kanila nga malayo sa kriminalidad nga paghunahuna lakip ang terorismo.
Kauban sa mobile library ang police teacher nga magtudlo ug moasistar sa mga bata unsaon pagbasa, pagsulat ug giya kanila unsay bout nilang makat-onan ingon man pagpasilitar kanila sa mga sessions.
Dungan kini nga kalihokan sa paglusad sa Iligan City Task Force To End Local Communist Armed Conflict isip tabang ug suporta as gobyerno sa pagtapos sa insurhensya.
Ang PRO-Northern Mindanao nag-apod apod ngadto sa mga bata og 200 ka back packs nga adunay sulod school supplies, 347 ka mga hygiene kits, 270 pieces medicine kits, 206 pieces water containers, 89 rubber bonds ug 200 key chains sa PRO hotlines isip starter kit sa mga nagtoun nga mga kabataan.
Ang provincial ug city police office ang gitakdang mosunod niining mobile library program sa ilang tagsa-tagsa ka mga area of responsibility aron mas daghan pa ang mga kabataan ang makahibalo.
"I conceptualize this idea to help the children coming from different sectors to be a good citizen in the future and never be encouraged to embrace the ideology of communism and terrorism and never be a criminal since they are the most vulnerable cluster of the society," matud ni Anduyan.
Giawhag sab niini ang katawhan ug publiko nga suportahan kini nga programa pinaagi sa pagdonar ug libro ug uban pa nga mga learning materials aron masustiner ug mapadayon kini nga programa.