GI-TOPPINGS sa rice ang utok sa usa ka babaye human giputlan og ulo sa gituohang dunay deperensya sa pangisip sa Barangay Punta Santiago lungsod sa Talisayan, Misamis Oriental.
Napalgan nga wala nay ulo, gihiktan ang mga kamot ug hubo ang katunga nga bahin sa lawas sa usa ka babaye kagahapon alas 5:00 sa buntag.
Sa gihimo nga follow-up operation sa kapulisan, nasikop ang suspetsado nga nailang si Lloyd Bagtong, taga Sta. Ines, susamang lungsod, ug gitouhang dunay deperensya sa pangisip.
Nakita sa puloy-anan ni Bagtong ang sako nga gisudlan sa putol nga ulo sa babaye.
Si Police Captain Maribeth Ramoga, hepe sa Talisayan Police Station, niingon sa SunStar Superbalita nga nagpabiling wala pay identipikasyon ang babaye tungod kay wala nakaila niini sa dapit ug lisud usab kini ilhon tungod giputlan man og ulo.
Ang ulo sab sa babaye nga nadiskubre gisulod og sako, gipanitan ug gigutad-gutad.
Sa pagsusi sa Scene of the Crime Operatives sa patayng lawas sa babaye, nadiskubreng gihiwa pa ang usa ka dughan niini.
Ang maong babaye nagsuot og pedal nga maong pants ug walay underwear.
Matud ni Ramoga nga naabtan pa sa iyang mga sakop nga imbestigador ang suspek nga gipa-ibabaw sa kan-on niini ang utok sa babaye nga wala giluto ug gikilaw.
Sa pagkasikop sa suspek, iyang giangkon nga nahinaykan ang babaye kay nagsige og iningles kung iyang estoryahon dihang iya lang nakadungan pagbaklay.
Dugang ni Ramoga nga walay uyab ang suspek ug kung mahubog, galasong ug niadtong tungora, dili man sab kini hubog ug aminado mga silingan dunay deperensya sa pangutok.
Abiso ni Ramoga sa nawad-an og sakop sa pamilya susihon kini sa Gomez Funeral Homes sa lungsod ug ipaubos sa DNA test o ingon man pa otopsiya kon gilugos ba sab kini.
Gituohan gani sa mga residente nga basin naglatagaw sab kining babaye nga biktima tungod sa kabaga sa kubal sa tiil nga posibleng anad og lakaw.
Dugang niini nga mao kini ang unang klase sa insidente nga natigayon sa lungsod nga halos gikakurat sa katawhan.