UBAY-UBAY ka mga kaso ang atubangon sa usa ka lalaki kinsa nag-amok ug nagbahad nga dunggabon si bisan kinsa nga moduol kaniya niadtong Disyembre 4 mga alas 7:30 sa gabii sa V. Neri Street, Carmen, siyudad sa Cagayan de Oro.
Malampusong si Arnold Geraldeso, 36, ulitawo, taga Zone-3, Zayas, Carmen ning dakbayan, ug giingong dunay deperensiya sa pangisip.
Sa pakighinabi kang Police Major Ian Borinaga, hepe sa Police Station 4 (PS4) sa Carmen, gikompirna sa inahan nga dunay deperensiya sa panghunahuna si Geraldeso.
Niabot usab ngadto sa mga kinse minutos ang negosasiyon hangtod nga nasikop kini.
"Naa daw deperensiya ingon ang mama," pahayag ni Borinaga.
Makita sa video nga nagwarawara sa iyang dalang kutsilyo ug nag-iskrima-iskrima ang suspek.
Gihangyo kini nga ihatag ang dalang kutsilyo apan wala kini nagpatuo rason nga gihimo sa kapulisan ang angayang buhaton hangtod nga natagak ang kutsilyo gikan sa mga kamot niini ug daling giposasan.
Posibleng mag-atubang og ubay-ubay nga kaso ang suspek sama sa illegal possession of deadly weapon, alarm and scandal ug disobedience to person in authority.
Swerteng walay nasamdan atol sa maong panghitabo, samtang sa pagkakaron, nagtingkagol na ang suspetsado sa bilanggoan.