MIHIMO’G kanaas ang mga atleta sa Sugbo sa ikalimang adlaw sa kompetisyon human kini nakatunol og tulo ka gold medals alang sa Pilipinas kagahapon sa 30th Southeast Asian Games.
Ang skateboarders gikan sa Queen City of the South ningharos sa gold medals sa ilang event diin nipatigbabaw si Margielyn Didal sa women’s Game of Skate ug Fil-German Daniel Lederman sa men’s Game of Skate sa Sigtuna Hall, Tagaytay International Convention Center.
Si Lederman, kansang inahan lumad nga taga lungsod sa Barili, Cebu, ug Didal parehong minglangkat sa labing una nilang gold medal ning matag duha ka mga tuig nga kompetisyon.
Sa wala pa si Lederman, si Didal maoy unang nipakita og aksyon sa all-Filipina finals.
Si Didal, kinsa gold medalist sa miaging Asian Games, milupig sa kababayang si Christiana Means sa finals.
Laing atleta sa Sugbo nga si Fil-Japanese Kiyomi Watanabe nakalangkat sab og gold medal sa judo event.
Nadepensaan ni Watanabe ang iyang titulo sa women’s judo 63kgs. division sa Laus Group Event Centre sa San Fernando, Pampanga.
Si Watanabe nagtinguha nga makasaka sa ranking points aron maka-qualify alang sa 2020 Tokyo Olympics. Moabot ngadto sa 12 ka gold medals ang puwedeng mabira sa judo event.
Ang laing nakahatag og gold medal sa Pilipinas kagahapon mao si Jylyn Nicanor, kinsa nipatigbabaw sa women’s individual sabre sa fencing event sa World Trade Center.
Si Nicanor, 27, milupig sa iyang Indonesian nga kaatbang sa finals nga si Diah Permatasari, 15-14, aron itunol sa Pilipinas ang labing una niining gold medal sa fencing.
Grabe ka sikit ang panagsangka nga kinahanglan pa nga i-review sa video ang katapusang duha ka mga puntos nga gihatag sa referee pabor ngadto sa Pinay.
Dili sayon ang naagian ni Nicanor una niya naangkon ang kalampusan gumikan kay nibangon pa siya gikan sa 5-8 nga pagkalubong sa finals.
Sa semis, miagi sab og pagpanghudlat si Nicanor una niya nalupig ang iyang kaatbang gikan sa Thailand nga si 2017 bronze medalist Tonpan Pokeaw, 15-9.
Mga alas 5:00 kagahapon, ang Pilipinas padayong nag-una sa medal tally diin mingburot na sa 127 ka mga medalya ang nahakot niini nga gibuak sa 60 ka mga gold, 45 ka mga silver ug 27 ka mga bronze.
Nagsunod sa Pilipinas mao ang Vietnam nga adunay 28-33-35 medal tally unya ikatulo ang Indonesia nga adunay 23-33-33 medal tally.
Sa laing bahin, giatangan karong buntag ang pagdagan ni Cebu Olympian Mary Joy Tabal sa women’s full marathon diin suwayan sa lumad nga taga brgy. Guba, Cebu City nga depensaan ang iyang titulo. (RSC, ESL)