BAG-ONG napili nga Kausaban Federation Officers nanumpa atubangan ni Lapu-Lapu City Mayor Junard Chan sa iyang buhatan sa City Hall niadtong Miyerkules, Disyembre 4.
Ang Kausaban nagpasabot nga Kababayen-an Alang Sa Kauswagan Sa Katilingban.
Ang mga opisyal naglangkob nila ni Diosaminda Hayashi, presidente; Jessica Tongol, vice president; Nenita Alforque, secretary; Thelma Bas, treasurer; Milagros Amores, auditor; Liwayway Quiboy ug Jessie Tatoy – press relation officers (PROs).
Samtang si first lady Cynthia Chan maoy nagsilbing honorary chairman sa naasoy nga grupo.
Ang maong pundok nga adunay mga sakop gikan sa 19 ka mga barangay sa mainland Lapu-Lapu mopatapok niadtong mga inahan nga buot makat-on sa panikaysikay aron nga maka-abag sa ilang bana o pamilya.
Ang Kausaban nagtanyag og libre nga skills training program, pagnegosyo o pagluto aron mahimong malambuon ang ilang panginabuhi pinaagi sa pag-abag sa ilang kapikas sa pagpabarog sa pamilya. (PR)