NAKADAYEG ko sa opening ceremonies sa 30th Southeast Asian Games nga gihimo didto sa Philippine Arena. Nindot ang tibuok programa. Smooth kaayo ang dagan gikan sa sinugdanan. Bongga!
Saludo ko sa mga performers sama nilang Lani Misalucha, Robert Seña, Aicelle Santos, Christian Bautista, Iñigo Pascual, Elmo Magalona, KZ Tandingan, Apl.de.ap, Jed Madela, TNT Boys, Anna Fegi ug ang Ramon Obosan Dance Troupe. Nakaka-proud, matud pa.
Kataw-anan nga bisan ang kanta nga Manila gidebatehan pa. Oki ra to nako. Ang wa nako mauyoni ang pagsayawsayaw ni Senador Ronald ‘Bato’ dela Rosa. Hinoon, iya sab to.
•••
Karon ug sa sunod semana, backstage una ang mga teleserye kay ang mga games ang akong gikalingawan. Nitutok ko sa telebisyon dihang gibuntog sa men’s volleyball team ang Cambodia.
Nasubo lang kog light sa pagkapilde sa women’s volleyball team batok sa Vietnam.
Mga pahalipay sa Team Philippines sa padayong paghakot og medalya.
•••
Bilib ko aning John Mark Saga (ang first runner-up ni Elaine Duran sa ikatulong season sa Tawag ng Tanghalan) kon kinantahay ang hisgutan.
Wa lang ko kauyon sa iyang choice of clothes parehas adtong grand finals ug sa iyang mga guesting. Morag tralala!
•••
Sa Lunes na gyud makita ang pagpakigtigi ni Ms. Phils. Universe Gazini Ganados sa labing prestihiyoso nga indigay sa kaanyag. Hinaut nga malangkat ni Gazini ang korona.
Atong suportahan si Gazini pinaagi sa pagbotar sa vote.missuniverse.com aron makasulod si Gazini sa Top 20. Ayaw paglangaylangay kay karong adlawa na ang deadline sa pagbotar.
Syempre, ayaw kalimot sa pag-ampo nga molampos ang dalaga sa iyang tahas.
•••
Akong giawhag ug gidapit ang tanang nigradwar sa Oslob Central Elementary School nga motambong ug moapil sa labing unang grand homecoming karong Dis. 22 (Dominggo).
Ablihi ang OCES Alumni sa Messenger alang sa mga updates. Atong lab-ason ang mga maanindot ug mabulokong mga tuig sa atong pagtungha sa elementarya. Kitakits!