HINAUT pang ipadayon sa Kongreso ang pagdiskuter kalabut sa pag-legalize sa medical marijuana kun pagamit sa kimekal gikan sa cannabis kun marijuana alang nga himuong tambal sa mga sakit. Aduna nay 33 sa 50 ka mga states, ug District of Columbia sa Estados Unidos (US) nga nagtugot sa medical marijuana. Ang atong gikahadlokan nga makalusot kining mga itanum nga marijuana ug magamit sa pag-adik-adik mapugngan pinaagi sa hugot nga seguridad sama sa ilang gihimo sa US.
Kining gitawag og Cannabidiol (CBD) gikan sa cannabis. Kining CBD usa ka popular nga tambal sa ordinaryong mga sakit. Usa kini sa 100 ka mga chemical compounds nga naila nga cannabinoids nga anaa sa marijuana. Kining CBD dili makahubog kon maka-“high” nga sama sa THC nga makuha gihapon sa marijuana.
Ako kining gihisgutan kay nakagamit ako niining CBD balm didto sa Estados Unidos ug sa gidala sa akong amigo dinhi gikan sa US. Mao kini ang maka-ayo sa akong muscle pain, arthritis ug ubang sakit sa lutahan ug ka-unoran. Ma-ingon hinuon nako nga relief lang kay dili man gayud permanenting maayo ang sakit. Apan daku kinig natabang sa akong pag-antus. Daghan usab nakong mga higala ang nakasuway ug na-alibyohan sa ilang arthritis sa CBD balm. Anaa pa kunoy daghang mga sakit nga sumala pa maayo niining CBD apan wala ako masayud niini. Mas maayong atong magamit nga tambal sa sakit kining marijuana inay nga sunogun lang kini sa mga tinugyanan sa balaud.
•••
“Luyo sa dakung bahandi, adunay krimen nga nahimo.” Mao kini ang kanunay nakong madungog sa akong katigulangan. Ang ilang gipasabut nga krimen mao kining pagpanikas sa mga bahandi-anon pinaagi sa dili pagbayad sa hustong buhis ug hustong sweldo sa ilang mga trabahante. Kadaghanan kanila dili modeklarar sa tanan nilang mga kabtangan ug bank accounts labi na og nagikan kini sa ilegal nga mga tinubdan. Mao kini katarungan nga kining mga hiwing negosyante buot kaayong makighigala sa mga dagkung pulitiko nga ilang gituhoan nga makatabang kanila panahon nga sila lisud-lisuron. Hadlok kaayo sila si Lucio Tan sa dihang gikolektahan ni Presidente Rodrigo Duterte sa binilyon niining utang sa Philippine Airlines. Hadlok usab kaayo si Manny Pangilinan sa dihang gihulga sa Presidente nga ipa-embistigar sa Bureau of Internal Revenue (BIR) ang libro sa iyang mga negosyo.
Unsa man guy ilang kahadlukan kon nagtinarong pa sila sa ilang negosyo? Mao nga akong gipaabut ang reaksiyon sa mga Ayala nga tag-iya sa Manila Water ug Manny Pangilinan tag-iya sa Maynilad Water Services Inc. sa hulga ni Pres. Duterte nga iya kining ikiha og economic sabotage. Dili kaha sila mokakak?
•••
Nganong wa man gyud kapatuman ang Cebu City ug ubang mga dapit sa Sugbo sa total ban sa pagamit sa plastic bag? Dugay na kining gipatuman sa Mandaue City. Buot bang ipasabut nga mas naghunahuna sa atong kalikupan ang mga opisyal sa Mandaue City itandi sa Cebu City ug ubang dapit? (mannyrabacal1144@gmail.com)