MAKAUUWAW kaayo ang standing sa Pilipinas sa assessment sa reading comprehension sa Programme for International Student Assessment (Pisa) sa Organization for Economic Cooperation and Development (OECD).
Ang Pilipinas nahimutang sa ika 79 nga dapit sa mga nasod nga niapil sa assessment sa Pisa niadtong 2018. Gawas sa English, nagbitay ang nasod sa Math ug Science base sa resulta sa exam nga giapilan sa 600,000 ka mga tinun-an.
Sa English, makauuwaw ni kay pwerte natong panghambog nga ang Pilipinas English speaking nga nasod isip ikaduhang linggwahe. Gani, naay daghang English schools dinhi sa Sugbo nga gitunghaan sa mga langyaw nga gustong makat-on niini kay mas barato itandi sa abroad.
Naalarma ang Department of Education (DepEd) sa resulta hinungdan nga nimando si Secretary Leonor Briones sa pag-review sa basic education curriculum.
Usa sa angay nga sutaon sa DepEd mao ang di maayong epekto sa kadaghan sa mga tinun-an. Kanang matag magtutudlo, dunay labing minos 50-60 ka mga tinun-an nga gihuptan. Magdasok pa sila sa usa ka classroom.
Naa pa gani ubang mga tunghaan nga mag-schedule sa ilang klase kay tungaan paggamit sa usa ka adlaw ang classroom. Naa say uban nga nagtunga sa usa ka classroom pinaagi sa dungan nga pagpahigayon sa duha ka mga klase.
Nasayran na baya nga ang palibot dako kaayo og impact sa pagkat-on sa bata. Kon hamugaway ang usa ka dapit ug di langas, mas maayo ang pagkat-on sa usa ka bata kay way makabalda.
Ang kakuwang sa pasilidad, kadaghan sa mga tinun-an nga gihuptan sa usa ka magtutudlo maoy usa tingali sa dakong rason nga di maayo og performance ang kinabag-an sa mga tinun-an.
Inay magtutok sa curriculum, hain kahay maayo nga paspasan ang pagtukod og school buildings ug manguhag daghan pang mga magtutudlo. Mao tingali ni ang dakong kuwang.