P500,000 nga mga alahas gikawat; helper nasikop

KATABANG gipusasan human gisakiyo niini ang P500,000 nga balor sa mga bulawan ug alahas ug relo sa iyang amo niadtong Miyerkules, Disyembre 4, sa Barangay Tungkop, lungsod sa Minglanilla.

Si Remia Mahusay, 41, minyo, taga Barangay Cabiba, Toboso, Negros Occidental, gipusasan human nabawi ang mga alahas nga iyang gikawat.

Si Major William Homoc, hepe sa Minglanilla Police Station, nga nahinabi sa Superbalita Cebu nagkanayon nga nangayo og abag ang usa ka managti-ayon kabahin sa pagkahanaw sa iyang mga mahalong alahas ug butang.

Matud pa niini nga sa gipahigayon nga imbestigasyon sa mga sakop sa Minglanilla Police nasuta nga gipanguha ug gitagoan sa maong katabang.

Nunot niini, gipusasan si Mahusay ug mag-atubang og kasong qualified theft.

Nasuta sa kapulisan nga wala makaabot sa usa ka bulan ang maong katabang dihang gidawat sa pamilya.

Si Homoc nibutyag nga posibling ang katabang nangita kinig timing sa iya untang pagsibat apan maayo na lang nabantayan sa amo niini ang pagkahanaw sa ilang mahalong mga alahas ug mga butang. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph