GIKATAKDANG pakigtagboan ni Lapu-Lapu City Mayor Junard “Ahong” Chan ang kadagkuan sa Department of Public Works and Highways (DPWH) aron hisgotan ang posibleng temporaryong solusyon sa kanunay nga pagbaha o pagkabara sa tubig sa national highway sa Barangay Canjulao ug Kinalumsan panahon nga mobunok ang kusog nga uwan.
Moabot sa tulo ka lugar sa naasoyng dalan ang kanunay nga magbaha panahon sa pagbunok sa uwan.
Ang dapit sulod sa dugay na nga katuigan gireklamo sa mga residente ug motorista sanglit daling mabahaan panahon nga mag-uwan nga mosangpot sa kahasol sa mangagi sa dapit.
Nasayran nga molanat pa usab og pipila ka oras una mohubas ang baha sa naasoy nga lugar bisan mohunong na ang uwan.
Kini gumikan kay nasayran wala gayud diay drainage ang nahisgutang mga dapit.
Matod ni Chan nga base sa iyang nahibaw-an aduna nay plano ang DPWH sa pagpalad sa naasoyng dalan sanglit sila man ang adunay hurisdiskyon niini ug dili ang dakbayan gumikan kay usa man kini ka national road.
Apan sa nahibaw-an ni Chan nga sa di pa palapdan ang naasoyng dalan diin gikatakda kining dugangan og laing duha ka lanes, butangan una kini og drainage aron kalikayan nga magpadayon ang suliran sa lugar nga baha panahon nga mag-uwan.
Sa pagkakaron, giingong giuna una sa ahensya ang national road sa habig sa Barangay Maribago ug Mactan area sa dili pa moabot sa naasoyng lugar.
Apan buot si Chan nga samtang wala pa matrabaho ang naasoyng dalan, magsabot sila sa DPWH sa posibleng temporaryo lang unang kasulbaran sa kanunay pagbaha sa dapit aron usab dili na mahasol ang mga motorista ug molopyo sa dapit.
“The three areas sa Kinalumsan mao nay ato nasad nga totokan kay even though they are not under the city kita may mag suffer we must push and follow up sa national government on that problem,at least we will try to check temporary solution nga murag band aid lang sa nga dili na mag suffer ang mga molopyo,” matod ni Chan.
Nasinati na usab ang grabeng baha sa maong dapit human sa pagbunok sa uwan nga dala sa bagyong Tisoy.
Buot ni Chan nga masulbad ang naasoy nga problema sa labing daling panahon. (GCM)