SUPPLY sa gidiling drugas sa Dakbayan sa Sugbo gipanglantawan sa kapulisan nga modagsa tungod sa nagkaduol na nga Pasko ug mga kalihukan sa Sinulog karong Enero 2020.
Tungod niini, gisaka karon sa Cebu City Police Office ang ilang monitoring sa ilegal nga drugas nga misulod sa siyudad.
Nagtuo na ang Deputy City Director for Operations sa Cebu City Pilice Office (CCPO) ,Police Lieutenant Colonel Randy Korret, nga nangabot na sa dakbayan sa Sugbo ang daghang supply sa ilegal nga drugas gikan sa mga silingang rehiyon.
Kini tungod kay nagkaduol na ang pagsaulog sa Pasko ug ang umaabot nga mga kalihukan sa Sinulog sa sunod buwan.
Matod ni Korret nga matag panahon nga magkaduol ang Pasko daghan og kwarta ang mga tawo diin ang mga drug supplier mopadala usab og daghang supply sa ilegal nga drugas tungod sa ka daghan nga mogamit niini karon sa druga.
Gumikan sa nakuha nga impormasyon sa kapulisan sa siyudad sa Sugbo gisaka na karon ang intelligence monitoring sa mga entry point sama sa mga pantalan nga didto i-agi ang mga kontrabando.
Apan usa sa mga problema nga nakita sa CCPO mao kadtong kabaybayonan nga mahimong didto idunggo ang drugas gikan sa mga silingang rehiyon sa Central Visayas nga mao usab karon ang gipangitaan og solusyon sa kapulisan.
Miyerkules sa hapon Disyembre 4, ang Police Drug Enforcement Group nakasakmit sa gituohang shabu nga mobalor ang tanan sa P3,000,000 gikan sa usa ka babaye sa Saint Jude Acres sa Barangay Bulacao, Siyudad sa Sugbo.
Nagtuo si Korret nga ang maong supply sa drugas dili susamag gigikanan sa nakuha sa Mambaling Police Station nga gituohan nga gikan sa Metro Manila.
Nabantayan usab niya nga mga bag-ong player ang kasagaran nga nadakpan karon itandi sa nanglabay nga mga tuig nga gawas sa ilang pagka drug pusher mo gamit usab sila. Apan karon igo lang nga modala sa supply nga drugs.
Gipangsubay na nila asa gikan ang supply sa drugas nga mangabot sa dakbayan sa Sugbo. (AYB)