KONTROBERYSAL nga gipanday nga sketch ordinance ang gibakwi sa Konseho sa Dakbayan sa Talisay.
Si Konsehal Ferdie Rabaya, chairman sa committe on traffic, niingon nga niadtong Martes sa buntag, Disyembre 3, atol sa ilang regular nga session, iyang gi-withdraw ang giduso nga balaudnon.
Gipasabot ni Rabaya nga nakadesisyon sila sa konseho nga mohimo pa sila og dugang pagtuon kalabot sa ordinansa aron sa paghan-ay pa niini ug masabtan pa sa publiko.
Sa pagkakaron, matod ni Rabaya nga ang mga traffic enforcer sa Dakbayan sa Talisay lang una ang tudluan kalabot sa sketching kon adunay disgrasya sa dan, sa di pa moabot ang mga traffic police.
“Naay amendments nga himuon, like sa atong CT-TODA (City of Talisay Traffic Operations Development Authority) personnel i-capacitate nga maoy mobadlis sa position of the vehicles when involved in minor accidents while waiting for the traffic police for the sketch,” gipasabo ni Rabaya.
Giduso ni Rabaya ang sketch ordinance sa Konseho nga mag-obligar sa mga motorista o mga driver nga magdala og chalk, pen o bisan unsang butang nga magamit pangbadlis sa dan o ang pag-sketch kon ugaling adunay mahitabo nga disgrasya.
Gikinahanglan usab nga mokuhag hulagway ang mga driver sa porma sa sakyanan nga gibanggaan ug nibangga sa upat ka mga anggulo.
Kini alang lang sa mga minor vehicular accident, kansang mga driver ang wa ra makaangkon og mga injury, sama sa dumbol, nasaghiran o uban pa.
Di kini aplikado kon aduna nay kinabuhi nga nakalas, injured daku nga danyos ang nahimo sa disgrasya.
Gitug-an ni Rabaya nga tinguha nila mao ang pagpakunhod o pagtubag sa nagka-grabe nga paghuot sa trapiko, ilabi na kon adunay disgrasya bisan kon gamay lang kaayo, gikinahanglan pa nga magpaabot sa imbestigasyon sa kapulisan sa lugar. (FMD)