Babaye dagiton o esnatsan ra?

DAGITON o esnatsan lang unta sa cellphone? Depende kinsa ang pasultihon.

Alang sa 16 anyos nga dalagang tinun-an sa senior high school, buot siyang dagiton sa tulo ka mga tawo nga nagsakay og green nga multicab.

Apan kon ang kapulisan maoy pangutan-on, ang tuyo sa mga sakay mao lang ang gikuptan nga cellphone sa dalaga.

Ang hitabo sa Sunrise Village, Barangay Poblacion, Pardo, Dakbayan sa Sugbo niadtong Miyekules sa gabii, Disyembre 4, 2019, nakapaukay tungod sa mga social post kalabot sa mga pagpanagit og mga bata sa mga tawo nga nagsakay og van. Ang kapulisan niklaro nga way pagpanagit o suway nga pagpanagit sa Sugbo ug Kabisay-an.

Naukay ang mga tanod sa Barangay Pardo sa pagreklamo sa dalaga kay gisuwayan siya sa pagdagit sa nagmaskara nga lalake nga sakay sa usa ka van nga kolor green.

Ang tinun-an lumolupyo sa Barangay Quiot apan miadto sa Sunrise village aron moapas sa iyang inahan.

Samtang naglakaw ang dalaga, usa ka multicab ang nagsunod kaniya.

Ang sakay nga lalake sa likod nikanaug ug niduol kaniya.

“Naghawid ko sa akong selpon ato, Sir, kay naa ko gireplayan. Unya nakabantay ko sa akong luyo nga dunay sakyanan nagpadulong ngadto paingon sa ako,” asoy ni Emily, di tinuod niyang ngan.

Ang sakay sa likod nisangpit kaniya dayong bira sa iyang walang kamot apan siya nakabuhi. Gikuptan na usab siya pagbalik.

Nakahigayon siya sa paglugnot ug gipatiran ang lalake nga nigunit kaniya.

“Mitawag, Sir. Miana nga, Day, Day. Mao to ingon ko unsa man tuyo ninyo sa akoa? Unya gibira akong kamot. Nakabuhi ko, Sir, pero gigunitan ko pag usab. Didto na nako siya gisipa ug murag natumba man to. Nidagan naman dayon ko,” dugang sa dalaga.

Si Emily usa ka varsity sa karate sa ilang tunghaan sa Dakbayan sa Sugbo.

Dali dayon nga niresponde ang mga tanod aron susihon ang pangangkon sa tinun-an apan wa na matod pa ang multicab.

Ang inahan ni Emily nga si Marites (di usab tinuod nga ngan, 45, nga nahinabi sa Superbalita Cebu, niingon nga human sa hitabo niadtong Miyerkules sa gabii, na-trauma ang iyang anak.

Di na gustong mouli ang iyang anak sa ilang balay ug adto una moestar sa iyang mga apohan.

Nakahukom na usab siyang pagakuhaon ang iyang anak kay mag-ulian kining mag-inusara.

Cellphone ray tuyo?

Sa imbestigasyon sa Pardo Police Station, nasuta nga di suway nga pagdagit ang nahitabo sa biktima kon di gisuwayan lang paglabni ang iyang cellphone. Di usab van ang gisakyan sa suspek kon di karaan nga multicab.

Si Police Major John Kareen Escober, hepe sa Pardo Police Station, nagkanayon nga ila pang subayon ang mga CCTV camera tungod kay ang camera sa establisemento nga duol sa giingong nahitaboan dili mo function.

“Ang nahitabo nag lakaw ang bata padulong uli. Murag ang interes sa tawo ang iyang cellphone kay nag chat-chat man kuno sa koan ba, sigeg atubang sa cellphone samtang naglakaw pauli. Nya nihunong daw ning van. Aw dili van, kanang multicab nga kagang-kagang pa gyud nya mi naog kuno tong tawo ug mi aksyon kunog gunit niya. Iyang gisipa. Nya mao na dayon to ang estorya nga naay mo abduct niya,”matod ni Escober.

Si Konsehal Dave Tumulak, chairman sa police matters sa Cebu City Council, mihinabi sa tinun-an.

Matod niya nga wa pay insidente sa pagpanagit sa siyudad sa Sugbo nga na report sa mga police station.

Apan sa nahitabo karon sa 16 anyos, nasagmuyo ang konsehal tungod kay mas giuna pa niini ang pag post sa social media una pa mi adto sa barangay ug police station.

Tungod sa insidente, niawhag si Tumulak sa publiko nga di dayon motuo labot sa gipang post sa Facebook, apan labing maayo nga magmabinantayon usab sila matinuod man o dili ang hitabo.