SUPERBALITA CEBU

Tabal nakuyapan human sa lumba

PAKYAS man tuod ang Philippine marathon queen nga si Cebuana Mary Joy Tabal pagdepensa sa iyang titulo apan usa ra gihapon ka Pinay ang nakalangkat sa gold medal sa 42-kilometer women’s marathon event sa 30th Southeast Asian (SEA) Games kagahapon sa New Clark Athletic Stadium sa New Clark City, Capas Tarlac.

Si Christine Hallasgo, kinsa lumad nga taga Malaybalay, Bukidnon, maoy midaog sa gold medal human sa duha ka mga oras, 56 ka mga minutos ug 56 ka mga segundos nga pagdagan.

Naangkon ni Hallasgo ang kalampusan bisan mao pa lang kini ang labing una niyang pagsalmot sa matag duha ka mga tuig nga kompetisyon.

Si Tabal, kinsa garbo sa dakbayan sa Sugbo, maoy nagsunod ug miangkon sa silver medal pinaagi sa oras nga 2:58:49.

Pag-abot niya sa finish line, si Tabal, kinsa lumad nga taga brgy. Guba, dakbayan sa Sugbo, nawad-an sa iyang panimuot hinungdan nga gidala kini pinaagi sa stretcher paingon sa medical room.

Naulian ra dayon hinuon si Tabal ug nakatambong pa kini sa awarding ceremony.

Pareho untang naggukod sila si Hallasgo ug Tabal kang Odekta Elvina Naibaho sa Indonesia sa hinapos na nga bahin sa lumba.

Apan sa wala damha, nakuyapan si Naibaho sa katapusang 400 meters hinungdan nga maoy naghatag og kahigayunan nila ni Hallasgo ug Tabal sa pagrehistro og 1-2 finish alang sa Pilipinas.

Ang representante sa Vietnam nga si Pham Hong Le Thi maoy miangkon sa bronze medal pinaagi sa oras nga 3:02:52.

Matod ni Hallasgo nga dihang ningbulhot na ang ilang mga kaatbang sa hinapos nga bahin, ang naa lang sa iyang alimpatakan nga kinahanglang usa kanila ni Tabal ang makahatag og medalya alang sa Pilipinas.

Asoy ni Hallasgo nga gidunganan niya og pag-ampo ang iyang pagdagan nga makaabot sila ni Tabal sa finish line.

Nakasinati og cramps sa iyang tiil si Hallasgo sa iyang paghiabot sa finish line mga alas 9:00 sa buntag.

Sa iyang bahin, nagkanayon si Tabal nga bisan wala niya nadepensaan ang titulo, malipayon gihapon siya nga usa ka kababayang atleta ang nakadaog sa gold medal.

Kini maoy ikatulong higayon nga nidagan si Tabal sa Seag. Una siyang miapil sa kompetisyon niadtong 2015 sa Singapore diin nakadaog siya og silver medal unya nakakuha siya’g gold medal niadtong 2017 sa Indonesia.

Sa men’s 42K race, si Agos Prayogo sa Indonesia (2:26:48) maoy midaog unya nagsunod sila si Sanchai Namkhet (2:27:18) sa Thailand ug Muhaizar Mohamad (2:23:08).

Sa laing bahin, ang laing taga Sugbo nga si Sherwin Mananguil nakadaog og silver medal sa obstacle course race (OCR) men’s individual x20 event.

Mga alas 5:00 sa hapon kagahapon, ang Pilipinas padayong nag-una sa medal tally nga adunay 68 ka gold medals, 51 ka mga silver ug 42 ka mga bronze.

Nagsunod ang Vietnam nga adunay 36-40-48 medal tally dayon ang Indonesia nga adunay 38-34-44 medal tally. (RSC, ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph