GIPADAYAG ni Ala fighter Donnie “Ahas” Nietes atol sa World Boxing Organization (WBO) Convention sa Tokyo, Japan nga tinguha niyang angkunon og balik ang kanhi niya gihuptang WBO super flyweight title.
Si Nietes, kinsa usa ka four-division world champion, mihangyo sa WBO nga hatagan siya’g kahigayunan nga ikaharong ang modaog sa world title fight tali nila ni Kazuto Ioka ug Jeyvier Cintron nga pahigayon karong buwana sa Tokyo.
Mibutho si Nietes sa WBO Convention aron dawaton ang iyang pasidungog sa iyang pagkahimong four-division world champion ning maong asosasyon.
Sa iyang mensahe gipadayag ni Nietes ang iyang hangyo atubangan mismo ni WBO president Francisco Valcarcel.
“I would like to take this opportunity to thank Mr. Paco Valcarcel and the WBO for their support all these years. Being a WBO world champion in three weight divisions for more than seven years meant the world to me. I am hoping the WBO would give me another chance to fight for the WBO super flyweight belt against the winner of Ioka vs Cintron. It will be a great honor for me to fight for the WBO championship again,” unod sa mensahe ni Nietes nga napatik sa www.philboxing.com.
Isip tubag, nagkanayon si Valcarcel nga huwaton lang una nila ang resulta sa away nila ni Ioka ug Cintron dayon ilang ibalik si Nietes sa WBO rankings sa super flyweight division.
Si Nietes maoy kanhi tag-iya sa WBO super flyweight title apan mas gipalabi niining buhian na lang ang titulo kaysa modepensa niini batok sa kababayang si Aston Palicte, kinsa nahimo niyang mandatory challenger.
Ang manager ni Nietes nga si ALA Promotions president Michael Aldeguer nagplano nga hatagan una og tuneup bout si Nietes una kini paawayon sa modaog sa Ioka-Cintron bout. (ESL)