TARRAGONA, Davao Oriental -- Moihap sa 10 mil ka mga punoan sa marijuana ang naibot sa awtoridad sa milabay nga adlaw didto sa Lombong, Sitio Tagbaloyan, Barangay Tubaon.
Ang aktibidad usa ka joint operation sa Tarragona Municipal Police Station, uban sa koordinasyon sa Philippine Drug Enforcement Agency (PDEA)-Davao Region.
Una niini, naabot ang taho sa kapulisan human usa ka nagpakabanang katawhan ang mihatag og impormasyon labot sa gipangtanum nga marijuana nga mokantidad sa P2 milyones.
Ang gitas-on sa marijuana anaa sa tag kwatro-metros diin human sa pagpaning-ibot niini, gipangdabdaban sa awtoridad.
Sa imbestigasyon nasayran nga usa ka Melindo Malintad ug ang anak niini nga si Jurel Malintad alias Palalan ang miatiman sa mga tinanum nga marijuana.
Sa maong aktibidad, anaa ang presensiya ni Barangay Captain Michael Tagaunsod ug representante media nga si Leonardo C. Caldelero Jr.
Nanganti ang kapulisan nga di nila lung-an ang pagsuhid sa mga hilit nga dapit aron maseguro nga walay gipangtanum nga marijuana. (Jeepy P. Compio)