MIPASALIG ang duha ka fighters sa Yaw-Yan ArDigma Cebu nga molampos sila sa ilang tagsatagsa ka tahas sa Fight Paradise Kibawe mixed martial arts/kickboxing event nga ipahigayon karong gabii sa Kibawi Municipal Gym sa Bukidnon.
Ang beteranong kickboxer sa YawYan Ardigma Cebu nga si Renan ‘Flash’ Noblefranca makigpinatiray batok kang Ely Fernandez sa Makati sa kickboxing event.
Nagkanayon si Yaw-Yan Ardigma Cebu founder Master Benigno ‘Ekin’ Caniga Jr. nga nindot kining awaya gumikan kay maayo sab og estilo ang kontra ni Noblefranca.
“Dili sab ni moatras ang iyang kontra pero gipangandaman gyud kini ni Flash,” matod ni Master Ekin.
Laing sakop sa YawYan Ardigma Cebu nga si Joseph ‘Wolf’ Mercado ang makigbinukbokay kang Jay Tancotian sa Tagum City sa MMA event.
Mopakita sab og aksyon ang laing duha ka Cebuano fighters nga sila si Jestoni Borres sa JB Dream Fitness Cebu ug Ryle Lugo.
Si Borres makigsangka kang Seto Masangkay sa Bukidnon sa usa ka MMA fight, samtang si Rhyle Lugo makigharong kang Rosauro Sagun. (ESL)