ANG balak maoy mga talidhay
ug danguyngoy sa kalag.
Ang balak usa ka matam-is
nga dugos sa pagbati.
Ang balak nga pinugad sa kahilom
maoy labing matam-is
nga pinulongan sa kalag.
Ang balak maoy labing matahom
nga daganasan
sa nagbul-og nga pagbati.
Ang balak maoy anak sa panagtiayon
sa hunahuna ug pagbati.
Ang gahom sa balak makapatay-og
sa tibuok kalibotan.
Ang usa ka matahom nga balak
maoy mensahe sa kinanaas
sa mga dahon nga huypon sa hangin.
Samtang ang magbabalak
usa ka buang nga sa kalibutan
sa mga buang dili matunto.
Ang magbabalak maoy gitugahan
sa Diyos pagtugkad sa mga
misteryo sa kinabuhi.
Ang kalantip sa dagang
sa magbabalak hait pa kaysa
hinagiban nga kanunayng gibaid,
Ang magbabalak mao lamay
makatugkad sa giladmon
sa mga pagbati nga nagbiaw
sa kasingkasing.
Ang handurawan sa magbabalak
moabot hangtod sa kinalay-ang bituon
Ang mga abot sa dagang
sa magbabalak maoy bahandi
nga labaw pa kabililhon sa bulawan.