DI KO kalimot ni Henry, akong klasmet sa Grade V, kay grabing tiyabaw ini dihang giyaga-yagan sa iyang gibitbit nga basket puno sa de kolor nga mansanitas pagparada namo sa mga utanon, lagutmon ug prutas pagsaulog sa Nutrition Month.
Nag-indigay ang mga tinun-an sa ilang mga mahalon ug imported nga mga prutas nga gipasundayag apan wa damha nga si Henry ang mananaog.
Kahibalo ka ba nga abunda ang mga prutas sa atong palibot nga barato unya sustansiyado pa?
Nag-una kining Saging. Maayo kini siya labi na niadtong kanunay mag ehersisyo ug dunay sakit sa kasing-kasing kay duna kini Potassium nga makatabang niadtong maglisod og katulog o segi og ka stress kay duna man kini Tryptophan.
Sunod kining mansanas nga taas og anti-oxidants. Di kini angay panitan inig kaon kay ang iyang panit dunay Pectin nga maoy motangtang sa hugaw sulod sa lawas. Makatabang sab kini pagpa-ubos sa cholesterol, arthritis ug mga sakit-sakit sa tiyan.
Ang aslom nga mga prutas sama sa Lemonsito, Kahil, Lemon, Orange , Dalandan, ug Buongon daghan sab og Bitamina C nga mobatok sa sip-on, ubo, hubak ug arthritis. Hinumdumi nga kon mokaon ka ini apilon iyang mga gagmay ug nipis nga membrane kun pulp bits kay mao kini maka-ayo sa ginhawaan. Mao sab ni rason nganong ang mga biyahero pa kan-on ini aron mawala ang kasukaon.
Kining hinog nga Kapayas taas sab og Bitamina A ug C nga dako og matabang pag-pahamis sa kutis ug paayo sa pamanit. Duna kini Papain nga dako og matabang pagtunaw sa atong gipangaon ug regular nga makapagawas sa hugaw sa lawas tungod kay taas kini og fiber.
Ang tubigon nga pakwan ug melon dako sab og matabang labi na niadtong dunay sakit sa pantog o impeksyon sa bladder o kidney unya puno sab kini og Bitamina C ug Potassium.
Sunod kining Butong. Ang lab-as nga prutas sa lubi dako og matabang niadtong dunay gibati sa kidney. Makalimpyo sab kini sa tinae.
Katapusan kining Avocado kay duna kini good fats ug B6 para pahimsog sa kasing-kasing.