MAAYO kay naundang na ang mga estorya sa social network kabahin sa mga pagpanagit nga di diay tinuod. Maayo usab nga nahukman sa kapulisan nga pasakaan og kaso ang 21 anyos nga lalakeng tinun-an nga nagtumo-tumo nga siya gisuwayan og dagit sa mga tawo nga nagsakay og van.
Gisusi sa kapulisan pinaagi sa close circuit television ang gipangsulti sa batan-on ug nasuta nga wa ang mao nga hitabo. Niangkon ra sab siya nga nisakay siya sa panahon.
Apan angay bang baliwalaon ang mga estorya sa pagpanagit? Di gyud. Di angay kompyansahan kay bisan ang kapulisan niingon nga angay magmatngon.
Di usab maayo nga pasagdan ang magbinuang kay gawas nga nagmugna kini og kahadlok, di na unya tuohan kon mahitabo nga tinuod na gyud, sama sa sugilanon sa “The Boy Who Cried Wolf.”
Ang labing maayong buhaton kon dunay hitabo sa pagpanagit o suway nga pagpanagit mao ang pagdangop dayon sa labing duol nga buhatan sa kapulisan, di ang pag-post sa social media ang unahon. Mas dali nga maka-report, mas dali nga makaresponde ang kapulisan ug dunay kahigayunan nga madakpan ang mga suspek. Human maka-report, anha na mag-post kay makatabang usab ang social media sa pagpakatap sa impormasyon sa usa ka hitabo kay duna nay pipila ka mga krimen nga nasulbad ug nadakpan ang mga kriminal pinaagi sa social media.
Ning nangahitabo karon, makita ang kapuslanan sa mga CCTV camera sa kadalanan. Kon wa pay CCTV camera, di tingali mabuko ang batan-ong lalake nga nagtumo-tumo ra diay og estorya sa social media.
Makita usab sa hitabo sa 16 anyos nga dalaga ang kakuwang sa pagpatrolya sa kadalanan sa mga barangay tanod, labina sa kagabhion. Di mataid sa kapulisan ang pagpatrolya sa tanang dalan, ang mga tanod dako kaayog ikatabang isip force multiplier.