MOABOT og 33 ka mga Talisaynon nga nag live-in sud sa pipila ka tuig nakapahimus sa libre nga mass wedding sa Biyernes sa hapon, Disyembre 6, 2019.
Gihimo kini diha sa simbahan sa Sto. Niño sa Barangay Mohon. Giabaga ni Talisay City Mayor Gerald Anthony Gullas ang tanan nga galastuhan.
Matod ni Gullas nga mamahimo na kini nga tinuig nga kalihukan atol sa semana diin nagsaulog usab siya sa iyang adlaw nga natawhan. Niadtong Disyembre 1, gisaulog sa mayor ang iyang ika-35 nga adlaw nga natawhan.
Ang mass wedding iyang regalo sa pagsaulog sa iyang adlaw nga natawhan ug pinaskuhan na usab sa maong mga magtiayon.
Pagpasabot sa mayor nga pagpapakita kini sa paghatag og bili sa Kagamhanan sa Dakbayan sa Talisay sa kaminyuon, ilabi na sa pamilya.
“Ako, kaduha ko naminyo, but with only one woman, sa mayor (Sara Duterte) and sa simbahan. While it is an honor to be married ubos sa usa ka mayor, mas lami ug nindot gyud ang feeling nga maminyo ka, manumpa ka atubangan sa Ginuo,” saysay ni Gullas.
Ang 33 ka mga magtiayon gikan sa 22 ka mga barangay, diin gipili kadtong mga nag-ipon sud na sa pipila ka tuig ug wa kapakasal ma pa simbahan o sa huwes o mayor man, tungod sa kawad-on.
Libre usab nga gihatag kanila ang reception o pakaon sa mga kasal ug sa ilang mga kabanay.
Gihimo kini sa dakung hawanan sa atubangan sa Talisay City Hall. (FMD)