NAGTAGBO pag-usab ang mga opisyal sa kapulisan sa Siyudad sa Sugbo, Sinulog Foundation Inc. ug ubang mga ahensya sa gobyerno alang sa sub-sub nga pagpangandam sa dakong kalihukan sunod buwan.
Usa sa ilang mga natuki ang mga angay buhaton usa ka adlaw sa di pa ang Sinulog grand parade. Matod ni Cebu City Police Office officer-in-charge Police Colonel Giovanie Maines nga moabot ngadto sa 1,700 ka mga pulis ang ipakatap sa rota sa Sinulog. Sila usab ang mobantay sa Walk with Mary ug Solemn Procession.
Gawas sa mga pulis nga gamiton sa siguridad, mogamit usab silag mga force multiplier sama sa mga barangay intelligence network (BIN) nga giuyonan usab ni Cebu City Mayor Edgar Labella.
“When we informed the mayor about that, he readily acceded to that and approved the plan to have those force multipliers to be also utilized during the Sinulog,” matod ni Maines.
Si Konsehal Dave Tumulak, executive committee chairman sa Sinulog, nagkanayon nga halos tanang organisasyon gipangayoan nilag tabang alang sa pagbantay sa mga kalihukan sa Sinulog.
Gawas sa mga barangay tanod ug ubang force multipliers, ila usab nga hangyuon ang uban sama sa habal-habal drivers, market vendors, parish security groups, Muslim community ug uban pa lakip na ang cause oriented groups.
Mga Grab ug Angkas drivers ila usab nga apilon aron sila ang mo-monitor kon adunay kadudahan nga mamatikdan ug motaho dayon sa kapulisan.
Matod ni Tumulak nga gi lakip nila ang telecommunication companies aron sila na mismo ang mobantay sa ilang pasilidad, apil na ang power and water facilities aron di mahasol ang publiko kon adunay mahitabo sa ilang mga pasilidad.
Gipasalig ni Tumulak nga nakahan-ay na ang tanan ug wa na siyay nakitang problema sa pagkakaron sama sa pundo nga alang sa pagpakaon sa mga mobantay.
“Kini nga organizations motabang ni sa PNP to see to it nga ang atoang fiesta senior magmalinawon,” matod ni Tumulak.
Sa pangutana kon uyon ba si Maines sa tinguha nga ibalik ang street party human sa grand parade, way supak niini ang officer in charge sa CCPO kon mao kini ang hukom sa mayor sa dakbayan.
Apan matod niya nga kinahanglan nga idili ang pag-inom sa ilimnong makahubog sa maong kalihukan tungod kay mao kini ang usa sa hinungdan sa kagubot.
“Wala namang problema kung yan ang gusto nila. But we are also requesting na sana may liquor ban,” sulti ni Maines.
Sa nanglabay nga katuigan nga adunay street party, nahimo kining bantayanan tungod sa kagubot.