ANG mga barangay kapitan sa dakbayan sa Mandaue nagpahungaw sa ilang mga kabalaka alang sa barangay clearing operations atol sa gipahigayong panagtapok sa tanang barangay captains kauban si Mayor Jonas Cortes.
Nabalaka si Barangay Kapitan Vidal Cabatingan sa Casili sa pagpatuman sa barangay clearing operation tungod kay ang mga miyembro sa task force sa ilang clearing operation kaila ra sab sa mga tawo sa ilang barangay.
Naguol si Cabatingan nga mokumpiyansa ang mga lumulupyo tungod kay kaila ra.
Hinungdan nga nihangyo kini sa Mandaue City Legal Enforcement Unit (MCLEU) sa ilang presensya sa higayon nga magpahigayon na sila sa ilang clearing operation.
Ang kapitan sab sa Barangay Labogon nga si Konsehal Amado Manatad nabalaka alang sa ilang seguridad sa panahon nga magpahigayon kini og clearing operation labi na og adunay lumulupyo nga manghasi.
Nihangyo siya og presensya sa kapulisan sa panahon nga magpahigayon na og clearing operation.
Apan alang kang Cortes, nakita niya nga nagpanagana ang mga kapitan sa pagtuman sa maong direktiba.
“Kinahanglan gyud nga naay political will to reclaim. Base sa mando sa Presidente (Rodrigo Duterte) nga we need to reclaim our roads, our sidewalks kay daghan man gud ang mga repercussion kon mag-demolish ta, daghan lang mahadlok ikiha,” sigon ni Cortes
Sigon sab niya nga way angay nga kahadlokan ang mga kapitan ug responsibilidad kini nila nga mopatuman sa maong direktiba nga way kahadlok ug di kini angay ikahadlok nga di na unya mobutar ang ilang mga tawo nila.
“Kon sige ta og kahadlok unya naa ta sa katungdanan, maayo pa og mamahuway ta aning pulitika,” sigon ni Cortes. (KFD)