LAING netizen pasakaan og kaso sa kapulisan tungod sa pagpa-post niinisa social media kalabot sa giingong insedente sa sulay nga pagpangdagit sa usa ka bata sa mga tawo nga nag-van.
Ning higayuna diha kini sa dakbayan sa Talisay.
Giangkon sa hepe sa Talisay City Police Station, Major Gerard Ace Pelare, nga gitun-an nila karon ang mga kaso nga ipasaka sa usa ka Talisaynon nga nagpost sa Facebook.
Matod ni Pelare nga usa ka inahan ang niduol sa barangay hall sa Jaclupan Huwebes, Disyembre 5 pag-report sa giingon nga 8-anyos niyang anak nga babaye nga gihunungan og van.
Ang pag-report sa inahan gikuhaan og video sa laing tawo nga adunay laing tuyo sa barangay hall, bisan way pagtugot sa inahan.
Gi-upload pa nga gihulagway ni Pelare nga nakapadugang sa panic sa publiko.
Ang post diha sa FB niabot kang Talisay City Mayor Gerald Anthony Gullas, diin nakadawat siya og ubay-ubay nga mga mensahe sa kabala sa ubang Talisaynon.
Dali usab si Gullas nga nitawag kang Pelare aron sa pagsusi sa kamatuoran sa nikatap.
Matod ni Pelare nga nihimo sila sa ilang pakisusi ug nasuta nga di tinuod ang sulay nga pagpangdagit.
“Gi-videohan niya ang ni-report, gi-upload sa Facebook. Sa among investigation, it was all paranoia ba, kay sige man ingnon ang bata nga naay mag-van nga manguha. Pero nangutana ra diay tong mga sakay sa itom og van. Nag-panic ang bata,” saysay ni Pelare.
“They should not jump into conclusion. Naay makadungog mao na dayon, twice incident na katong sa Danao ug diri sa Talisay. All are proven as hoax or unverified so that should give us a warning nga the possibility of it is very small. Of course, the community should always be watchful, unsay panghitabo sa palibot. But dili magpataka og post sa Facebook, because there is a criminal liability ana when you create panic,” dugang ni Pelare.
Si Pelare nakig-alayon sa kapulisan sa Danao kinsa nakapasaka na og kaso sa usa ka netizen sa susama nga panghitabo.
Nikonsulta na usab sila sa Regional Anti-Cybercrime Unit alang sa mga kaso nga mamahimo mapasaka.
Apan usa na sa ilang gitan-aw nga ipasaka ang mga kaso nga alarm and scandal ug kalapasan sa Anti-Wiretapping Law.
Sa iyang bahin, si Gullas sa iyang FB page, nipahinumdom sa mga Talisaynon. “Let this be a lesson to our fellow Talisaynons, especially those who are very active in social media: First, verify before posting. Giawhag ta mo nga i-check sa na inyong post sa dili pa ninyo i-share sa FB. Basin libelous na o makapasakit sa reputasyon sa laing tawo. Second, if you have any concerns regarding these alleged kidnapping incidents being reported on FB, rather than sharing it to others talk to your policemen.”