DUMAGUETE CITY – Namatay ang 76 anyos nga tiguwang lalake human nadasmagig Ceres bus niadtong miaging adlaw didto sa dakbayan sa Guihulngan, Negros Oriental.
Ang biktima mao si Dominador Barenas, 76, ug molupyo sa Barangay Hibaiyo sa nahisgutang dakbayan.
Samtang, ang nakadasmag mao ang Ceres bus nga may body number nga 7582 ug plate number nga GXR 624 nga gimaneho ni Manuel Teves, 47, kinsa molupyo sa Barangay Cadawinonan ning dakbayan.
Sumala sa imbestigasyon sa kapulisan, nga ang aksidente nahitabo mga alas tres sa hapon sa National road sa Hibaiyo.
Matod sa kapulisan nga samtang ang Ceres bus nagdagan paingon sa amihanan nga direksiyon apan sa pag-abot nila sa dapit nga nahitaboan ang biktima gialigar nga kalit lang milabang sa karsada ug maoy hinungdan nga nadasmagan kini.
Ang biktima nalagpot ug nakaangkon og grabeng angol sa nagkadaiyang bahin sa kalawasan.
Gisuwayan kini sa pagdala sa tambalanan apan gideklarar kini sa mga doctor nga patay dihang miabot. (LEJ)