NABUAK ang ulo sa usa ka lolo human nabanggaan sa motorsiklo niadtong Sabado mga alas 7:00 sa gabii sa lungsod sa Initao, Misamis Oriental.

Giila ang biktima nga mao si Francisco Versada, 78, taga Barangay Tubigan, sa susamang lungsod.

Matud sa paryente sa biktima nga nahinabi sa Sun.Star Superbalita nga gikan nga nag-inom si Versada ug hubog nga mitabok sa kalsada.

Wala namatikdan niini ang motorsiklo kinsa kusog sab kaayong nagpadagan niadtong tungora.

Deretsong nabanggaan si Versada ug maayong pagkalagpot niini. Nabunal ang ulo sa semento ug maayong pagkabuak. Gawas nga nakaangkon pa ang biktima og ubay-ubay nga bun-og sa kalawasan.

Dali nga nga gidala ang biktima sa mga partyente niini sa Northern Mindanao Medical Center (NMMC) ning siyudad sa Cagayan de Oro aron patambalan.

Tuod man nag ginhawa pa ang biktima sulod sa balay tambalanan apan mga alas 11:45 sa gabii nakabsan sa iyang kinabuhi si Versada.

Matud sa paryente nga boluntaryo man sab nga mitahan sa Initao Police Station ang driver nga nakabangga sa biktima ug gikostudya sa kapolisan ning panahona.

Posibleng kasong reckless imprudence resulting to homicide ang atubangon sa suspetsado.

Sa pagsulat ning balita gidala na ang patayng lawas sa puloy-anan niini sa lungsod sa Initao.