Bata nahug sa dagat, nalumos

IGO na lang sa pagmahay ang amahan ni Dexter Berdon, usa ka tuig ang edad, sa gidangatan sa anak.

Sakit man tuod alang kang Daniel ang nadangatan sa iyang anak, apan nahitabo na kini.

Wa magdahom si Daniel nga dunay dautang mahitabo kang Dexter, kinsa nalumos human natagak sa dagat human nabuwasot sa sawog sa ilang pinuy-anan ug nalumos pasado alas 11 sa Miyerkules sa gabii.

Ang balay sa banayng Berdon anaa mahimutang sa dagat sa Sitio Apro, Brgy. Ibo, Dakbayan sa Lapu-Lapu.

Matod ni Daniel nga si Dexter naghagwa-hagwa uban sa 3-anyos nga maguwang nga si Luke sa wa pa ang hitabo.

Dunay buslot ang sawog sa kwarto sa balay nila ni Daniel gumikan sa kagabok na niini.

Igo lang kini nga gialihan nila og kahoy aron kalikayan ang disgrasya, apan niadtong tungora, wa kini makasawo sa anak.

Ang asawa ni Daniel giingong milakaw usab niadtong tungora gumikan kay adunay importante nga giatiman

Saysay ni Daniel nga si Luke misulti sa iyang ubang mga igsuon nga natagak si Dexter.

“Natug naman gud unta ni sila unya naghagwa-hagwa. Ambot ngano ni nga giduot man kuno aning usa (Luke). Mao nato niingon ni nga si Bebe nawala mao nabawo mi pangita,” matod ni Daniel sa Superbalita Cebu.

Way nakamatikod nga nahagbong si Dexter kay wa mosulti si Luke. Diha na nabantayan kay nangita ang mga igsuon niini.

Mga pasado alas 2 na sa kadlawon sa Huwebes nakit-an si Dexter apan patay na kini.

Taob usab ang dagat niadtong tungora, sumala pa ni Daniel, hinungdan sa pagkalumos sa iyang anak.

Wa usab kini motiybaw dihang natagak sa dagat hinungdan nga wa mamatikdi.

Giangkon ni Daniel nga gumikan sa kalisod, wa nila mapaayo ang nabuslot nga sawog sa ilang kwarto. Wa siyay klarong pangita gawas sa pagka mekaniko apan, giingong di usab kanunay ang iyang kustomer. Ang asawa niya wa usay trabaho.

“Gamay ra akong income gyud, Sir, maong wala gyud namo mapaayo ang among balay,” matod ni Daniel.

Giabaga na hinuon ni Lapu-Lapu City Mayor Junard “Ahing” Chan ang pagpalubong ug pagpalit og lungon. Gawas niini, gitagaan na usab sa mayor ang banayng Berdon og cash assistance gikan sa iyang kaugalingong bulsa. Sa Lunes gikatakdang ilubong ang lawas ni Dexter.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph