NAKAPUGNIT og luna alang sa finals si Eumir Marcial uban sa laing duha ka mga Pinoy boxers sa nagpadayon nga 30th Southeast Asian Games nga gipahigayon sa PICC Tent, Biyernes, Disyembre 6, 2019.
Gilupig ni Marcial si Che Ami Mohd Aswan sa Malaysia pinaagi sa referee-stop-contest sa first round sa middleweight division aron pag-abante sa gold medal round.
Uban kang Marcial sa finals mao usab sila si Carlo Paalam ug Josie Gabuco.
Nabuntog ni Paalam si Mohd Redzuan Muhamad Fuad sa Malaysia, 5-0, sa men's lightweight division samtang si Gabuco, ang kasamtangang Asian champion, mipukan usab ni Thi Diem Kieu sa Vietnam, 5-0, sa women's light flyweight division.
Gipakita ni Marcial ang iyang kalidad isip silver medalist sa world championship, pinaagi sa pagpauwang sa iyang mga kinumo nga nakapaaghat sa referee sa pagpaundan sa iyang kontra sa nahabiling 1:06 sa first round.
Ikasangka ni Marcial sa final ang Vietnamese nga si Nguyen Manh Cuong kinsa mi-knockout ni Siv Songmeng sa Cambodia.
Si Paalam mosakbang usab ni Langku Kornelis sa Indonesia, kinsa mipukan sa taga Cambodia nga si Sao Rangsey, 5-0.
Ang pambato sa Indonesia nga si Endang Endang mao usab ang makontra ni Gabuco sa final match.
Si Endang midaog semis batok ni Htoo Aye Nyein sa Myanmar, 5-0. (JBM)