SUPERBALITA CEBU

Daniela mihakot og mga medalya

MAS grabe pa kumpara sa gilauman ang gipakita ni Cebuana gymnast Daniela Reggie Dela Pisa sa iyang paghakot og mga medalya sa labing una pa lang niyang pagsalmot sa Southeast Asian (SEA) Games gymanstics event.

Ang 16 anyos nga si Dela Pisa midaog og gold medal sa women’s rhythmic gymnastics hoop event ug bronze medals sa rhythmic gymnastics balls ug gymnastics clubs kagahapon sa Rizal Memorial Coliseum sa Manila.

Si Dela Pisa nakakuha og dagkong puntos sa skills ug difficulty categories aron pagrehistro og kinatibuk-ang 17.750 puntos nga nagtuboy kaniya sa ibabaw.

Ang silver medalist nga si Izzah Amzan sa Malaysia nakakuha og 16.500 puntos samtang ang bronze winner nga si Amy Dict Weg Kwan sa Malaysia gihapon adunay 15.900 puntos.

Si Dela Pisa, kinsa anak sa usa ka kanhi gymnast ug basketball varsity player sa University of the Visayas (UV), nagkanayon nga grabe ang iyang kalipay nga nakahatag siya og dungog sa nasod sa matag duha ka mga tuig nga kompetisyon.

Human niini, si Dela Pisa nakahakot sab dayon duha ka bronze medals sa rhythmic gymnastics balls diin nakakuha siya og 15.600 puntos ug gymanstics clubs diin nitali siya og 16.100 puntos.,

Si Dela Pisa inanay nga naghashas sa iyang abilidad sa nagkadaiyang mga kompetisyon dinhi sa Sugbo sama sa Cebu City Olympics, Central Visayas Regional Athletic Association ug Milo Little Olympics hangtod nga nahimo siyang multi-gold winner sa Palarong Pambansa.

Sa wala pa siya nihimo’g pangalan sa gymnastics sa Sugbo, si Dela Pisa nakigbatok pa sa sakit nga Stage II ovarian cancer sa edad nga kuwatro anyos, usa ka tuig human siya nagkat-on sa gymanstics.

Nasugakod ni Dela Pisa ang iyang sakit ug nagpadayon sa iyang gikahiligan nga natad sa paugnat sa kusog.

Si Dela Pisa mao ang labing unang Pinay nga midaog og gold medal sa rhythmic gymnastics gikan ni Maria Victoria Alicia Jacinto niadtong 2011 SEA Games.

Ang iyang inahan nga si Darlene nagkanayon nga ang ilaha ra gyung pangandoy nga makaabot ang ilang anak sa SEA Games ug wala sila magdahom nga makahakot kini og mga medalya.

Si Dela Pisa nag-training sa Hungary ubos sa paggiya ni Hungarian coach ug two-time Olympian Dura Vass.

Matod ni Darlene nga dako gyud ang natabang sa paglambo sa abilidad sa iyang anak ang pag-training niini sa Hungary.

Sa Tagaytay City Extreme Sports Complex, ang laing garbo sa Sugbo nga si Margielyn Didal nakahakot na sab og laing gold medal sa women’s skate competition, ning higayuna sa Skateboarding Street category.

Mga alas 6:00 sa gabii kagahapon, ang Pilipinas aduna nay 81-59-60 gold-silver-bronze medal tally ug naseguro na niining daan ang overall title.

Nagsunod sa Pilipinas mao ang Indonesia nga adunay 47-45-53 medal tally. (RSC, ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph