VIGAN CITY, ILOCOS SUR - Dili lang usa ka gold apan upat ka gold medals ang gilangkat ni gymnast Daniela Reggie Dela Pisa alang sa Central Visayas Regional Athletic Association (CVIRAA) rhythmic gymanstics event sa kasamtangang nagpadayon nga 2018 Palarong Pambansa.
Nagkanayon ang inahan ni Daniela nga si Darlene, 42, kinsa iyaha usab nga coach, nga malipayon siyang nakuha sa iyang anak ang ilang tuyo ug tumong karong tuiga ning maong kompetisyon.
“Siyempre lipay pud kay mao baya ni among gi-aim gyud. Happy gyud mi sa nakuha niya karon nga tuig kay among target is karong tuiga nga maka-gold gyud siya, nga ma-overall champion gyud siya,” asoy ni Darlene.
Si Daniela, 14, kinsa tinun-an sa grade 8 sa University of the Visayas, nakasungkit og upat ka gold medals sa mga kategoriya nga individual all around, rope, hoop, ug ball.
Gawas niini, nakalangkat sab si Daniela og silver sa clubs category ug bronze sa team secondary girls.
Gipasabot ni Darlene nga nagkatay na sa ilang kaugatan ang gymnastics, Ang pamilya sa iyang inahan nga lumad nga taga barangay Hipodromo, Cebu City kaliwat og gymnasts.
Gituohang mao na kini ang katapusang pagkampanya ni Daniela sa matag tuig nga kompetisyon tungod kay posible nga malakip na kini sa National Junior Gymnastics Team sa nasod.
Sa miaging tuig, si Daniela maayo sab og gipakita ug nakakuha kini’g tulo ka gold, usa ka silver, ug duha ka bronze medals sa secondary girls.
Niadtong nagkampanya pa siya sa elementary division, nanghakot sab kini’g daghang mga medalya sa Palaro.
Si Daniela, kinsa kalima na misalmot sa Palaro, nagsugod sa gymnastics dihang nag-edad pa lang kini og otso anyos.