MGA STAR players sa high school division sa Cebu Schools Athletic Foundation, Inc. (Cesafi) nga nigraduwar na sa secondary level ang mopakita og aksiyon sa 2019 Minglanilla Mayor's Cup Inter-collegiate Christmas League sa Minglanilla Sports Complex nga sugdan Sabado sa gabii, Disyembre 7, 2019.
Kini human nga nalakip sila sa lineup sa ilang tagsatagsa ka mga collegiate teams nga misalmot sa tinuig nga lega.
Ang University of San Jose Recoletos (USJ-R) Jaguars ni coach Leodie Garcia milakip kanila ni Kendrick Abarquez, ang most valuable player sa niaging Cebu Governor's Cup, ug Kevin Canaya Guibao, ang most valuable player sa Cesafi All-Star Game.
"Actually, sagad sa among mga bag-o gikan gyud sa high school. At least mahatagan sila og exposure para college level," matod ni Garcia kansang Jaguars makigsakbang sa University of Southern Philippine Foundation (USPF) Panthers sa opening karong gabii.
Ang Panthers, sa ilang bahin, moparadas usab sa ilang mga bag-ong recruits nga naglakip usab sa pipila ka mga high school standouts.
Ang University of the Visayas (UV) Green Lancers nga ugma, Disyembre 8 mao'y makontra sa Jaguars, milista usab sa ilang triggerman sa high school nga si Albert Sacayan.
Samtang gipaabot nga moduwa usab ang anak ni PBA Cebuano Hotshot Dondon Hontiveros nga si Isiah Blanco-Hontiveros sa University of Cebu (UC) Webmasters.
Kuyog ni Hontiveros sila si James Incio ug ang laing six-footer nga si James Lapasa.
Ang Webmasters makigsangka sa bag-ong Cesafi champions Southwestern University-Phinma Cobras sa Lunes, Disyembre 9.
Si Minglanilla Mayor Lelanie Pena gipaabot nga motambong sa opening day ug mohatag sa iyang hamubong mensahe ngadto sa mga partisipante. (JBM)
Mga duwa (Sabado, Disyembre 7):
6:30 pm. - Minglanilla vs. Talisay (21-under exhibition match)
8:00 pm. - USJ-R Jaguars vs. USPF Panthers