GIANGKON sa Commission on Elections (Comelec) nga wala silay mahimo sa mga gihimong pulong-pulong sa mga kandidato sa lokal nga posisyon bisan pa man og klaro na kaayong sayo kini nga pamaagi sa pagpangampanya sa umaabot nga piliay.

Matud ni Comelec-Autonomous Region in Muslim Mindanao (Armm) Regional Director Atty. Rey Sumalipao, makahimo sila og dali nga lakang batok sa kandidato apan ila na nalantawan ang i-rason sa mga kandidato nga igi lang sila nag-edukar sa mga botante.

Dugang ni Sumalipao nga di nila mahimong masikop ang mga kandidato nga mirason nga mihimo lamang og voter's education, ilabi na og way lig-ong ebidensiya nga ika-presenta ug tawong moreklamo.

Sumala niya nga wala pa sab makadawat og reklamo ang ilang buhatan batok sa mga politikong diskumpiyado sa mga gihimo sa ilang kaatbang.

Hinuon, gibantayan pag-ayo karon sa Comelec ang mga double registrants sa Armm nga posibling magamit sa halapad nga pagpanikas sa taliabot nga eleksiyon.

Apil na kadtong mga kandidato nga dunay mga private armed groups nga mohulga sa mga botante aron sila iboto o kaha bayaran. (Edgardo Fuerzas)