ANG graduate sa Davao Doctors College nga si Shaina Kei Cruiz Watanabe maoy nanguna sa Philippine Nurse Licensure Examination, Nobyembre 2019.
Ang 21-anyos nga registered nurse sa pakighinabi sa SunStar Davao nagkanayon nga ang kalampusan iyang gidalit sa iyang pamilya.
“The moment I heard the news, I thought it was a joke. But when I checked it, I was literally shaking and it was surreal,” niya.
Apan luyo ning kalampusan, nagpahipi ang paglaum, nga unta mahimamat niya sa pagbalik ang iyang amahan.
Suma niya, uwahi niyang nakita ang iyang amahan dihang anaa pa siya sa high school.
Niya pa, nagbuwag ang iyang ginikanan dihang anaa pa siya sa elementarya.
“I don’t have contact with my father since high school. But before our communication was cut, we were in good terms. The last news I heard about him, he has cancer,” sigun niya.
Malaumon ang dalaga nga mohimo’g pamaagi nga ikontak siya sa iyang amahan.
“I am looking forward to that,” dugang niya.
Dihang nagbuwag ang iyang ginikanan, siya ug iyang igsuon nagpuyo uban ang ilang inahan nga nagtrabaho isip English teacher sa Japan.
Gipasalamatan sab niya ang iyang iyaan nga usa sab ka OFW, nga misuporta sa iyang edukasyon.
Dihang gipangutana kung unsa ang iyang plano, “I don’t have a concrete plan yet. I just want to rest and after, work as a nurse in Davao City.”
Ang mahiligon sa anime miangkon og 89.60% nga iskor sa Nursing exams.
Niya wa gyud sa tumong niya nga manguna, apan pangandoy niya nga makapasar tanan niyang batch nga mikuha sa eksam.
“I just hope I can inspire others that they can do it. The important thing is they’ll put God in the center of their journey and nothing will go wrong. Also, they should have the motivation within them,” ni Watanabe.
Samtang si Davao Doctors College president Prof. Miguel Soledad nga human ang walo ka tuig diin walay nag-topnotch kaniya, karon, gikonsidera nilang ‘big comeback’ kini sa nursing field.
“This is a reflection of the quality of education we have. Our approach really is we prepare our students the moment they enter the program.”
Isip pahalipay, gihatagan nila sila Watanabe og P100,000 cash incentives sa tunghaan.
Ang flight ug akomodasyon niya abagahon sa DDC atol sa iyang pagpanumpa sa Manila.
Ang Professional Regulation Commission mipahibalo sa nakalabay nga Huwebes, diin 7,627 ang mipasar gikan sa 13,816 nga mikuha sa eksam.