Mga opisyal sa Compostela Valley nanguna’g botar

COMVAL. Si Governor Jayvee Tyron Uy nanguna sa pagbotar sa ilang presinto sa Magnaga Elementary School Sabado, Disyembre 7, 2019. (Dexter T. Visitacion)
COMVAL. Si Governor Jayvee Tyron Uy nanguna sa pagbotar sa ilang presinto sa Magnaga Elementary School Sabado, Disyembre 7, 2019. (Dexter T. Visitacion)

COMPOSTELA VALLEY PROVINCE -- Nanguna ang mag-amahang Uy sa pagbotar sa gipahigayong plebisito sa pag-usab sa pangalan sa Compostela Valley Province ngadto sa Davao De Oro.

Ang batan-ong Gobernador Jayvee Tyron Uy didto mibotar sa Precinct 63A sa Magnaga Elementary School sa lungsod sa Pantukan alas 7:30 sa buntag, Disyembre 7, nga gisundan pod dayon sa amahan, kanhi Governor Arturo “Chiongkee” Uy nga mibotar sab sa samang presinto.

Human makabotar, namahayag ang gobernador dungan sa pag-awhag sa mga wa pa makabotar nga manggawas sa tagsa-tagsa nila ka mga panimalay aron nga mosalmot sa plebisito nga gipahigayon.

“Mao na gyud ni ang gitakda, miabot na gyud, humana ko og boto, kamo na pod. Manghangyo ko nga manggawas ta sa atong panimalay ug mobotar ta ug ‘Yes, Davao De Oro,” hagit sa gobernador.

Samtang ang konsehal nga si Myrel Visitacion Bancasan sa lungsod sa Compostela, mipadayag sa iyang kalipay human makabotar didto sa Compostela Central Elementary School.

“Glad to be a part of our Province History. Yes to Davao De Oro,” post sa konsehal sa iyang Facebook Account.

Laing konsehal sa lungsod nga si Ricky Hechanova mipadayag sab sa iyang suporta pinaagi sa pag-post sa iyang hulagway samtang mibotar sulod sa presinto uban sa post nga “I’M DONE TO VOTE !!!! YES TO DAVAO DE ORO.”

Ug sa lungsod sa Maco, human nga makaboto, gipakita ni Vice Mayor Arthur Carlos Voltaire Rimando ang tinta sa tuong kumagko agi’g kamatuoran nga nahuman na siya pagbotar dungan sa post sa Facebook account nga nagkanayon “unsa pa inyong ginahulat Macoenos ?!... let us All Get Involved and say Yes to This Golden Opportunity!”

Samtang sa mga yanong lungsuranon, aduna may pipila nga wa nagpakabana sanglit alang nila moboto man sila o dili, modaug gihapon ang Yes.

Apan kung ang pipila way pagpakabana, adunay mga lungsuranon nga bisan sa kapit-os sa sitwasiyon, mipursige gihapon sa pag-adto sa presinto ug mibotar.

“Sayang akong boto kung di nako hatagan og bili. Maayo na lang maapil ta sa history sa probinsiya nga usa ta sa mga nakapadaug nga mausab ang pangalang Comval ngadto sa pagka-Davao De Oro,” butyag sa batan-ong inahan nga nagkugos sa masusong anak human nga nakabotar.

Sa pagsulat ning maong balita, padayon ang gihimong plebisito nga diin padayon nga nagkadaghan ang mga tawo nga miadto sa tagsa-tagsa nila ka mga presinto aron nga makabotar. (Dexter T. Visitacion)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph