CARMEN, Davao del Norte -- Balhog sa prisohan ang usa ka lalaki kinsa nagdala-dala og granada sud sa videoke house sa Carmen Public Market, Purok 7, Barangay Ising, Carmen, Davao del Norte alas 11:20 sa gabii niadtong Huwebes, Disyembre 5.
Ang suspek nailhang si John Mark Prancona Yu, 22-anyos, residente sa Purok 11, Barangay Ising.
Giingon nga sa maong takna, ang suspek nga kustomer iyang gibutang ibabaw sa lamesa ang usa ka granada nga maoy nakapahadlok sa ubang kustomer.
Gilayong miresponde ang intel operatives sa Carmen Municipal Police Station ug gidakop ang suspetsado human wala kini nakapakita og papeles sa granada.
Depensa sa suspek nga wala siya’y dautang tumong sa maong granada apan bisan pa man niini, kasohan gihapon siya didto sa korte. (Jeepy P. Compio)