HOT pursuit operation ang gihimo sa kapulisan sa Mabini Municipal Police Station batok sa suspek sa pagpamusil nga nahitabo Huwebes sa gabii, Disyembre 5, sa Mascareg, Barangay Anitapan, Mabini, Compostela Valley Province.
Ang biktima nailhang si Ponciano Entero, supervisor sa Bayalas Tunnel ug residente sa Barangay Baylo, Monkayo samtang ang suspek nailhang si Diego Maglasang, residente sa Sibagat, Agusan del Sur.
Sa inisyal nga imbestigasyon ni Police Staff Sergeant Erick Anton Boris, giingon nga nag-inom ang biktima uban sa iyang ka-trabaho.
Dihang padung na unta matulog ang biktima, gisundan kini ug gisulod sa suspek sa kuwarto dayon gipusil gamit ang wala matino nga kalibre sa armas tumong sa ulo.
Sa maong hitabo, namatay dayon biktima samtang ang suspek daling misibat. (Jeepy P. Compio)