BUNAWAN, Agusan del Sur -- Gipangita na karon ang usa ka patrolman nga pulis human iyang gipusil ang iyang labaw sud sa ilang baraks alas 9:25 sa gabii niadtong Biyernes, Disyembre 6.
Ang insidente nahitabo sa headquarters sa Agusan del Sur 2nd Provincial Mobile Force Company (PMFC-Caraga Region), Purok-1, Bunawan Brook, Bunawan, Agusan del Sur.
Si Police Staff Sergeant Gil Ursos, imbestigador sa maong insidente, naila sa suspek nga si Patrolman Jhon Paul Gerida, Class-2015 Alagad, minyo, ug nadestino sa ADS 2nd PMFC.
Nailhan sab ang biktima nga si Police Lieutenant Col Rex B. Lomente, minyo, ug force commander sa ADS 2nd PMFC.
Subay sa spot report sa Police Regional Office (PRO-Caraga), ang biktima ug ang suspek dunay gihisgutan sud sa opisina dihang kalit na lamang nadunggan ang kusog nga buto sa armas.
Giingon nga gipusil sa suspek ang iyang labaw gamit ang .45 kalibre nga armas hinungdan nga nakaangkon og samad sa ulo ang biktima kinsa gidali og dala sa Bunawan District Hospital apan gibalhin kini sa Tagum Regional Hospital.
“Sa pagkakaron, ginapangita na gyud ang suspek gumikan sa krimen nga iyang nahimo,” ingon ni PSSg Ursos nga nahinabi sa Superbalita Davao pinaagi sa telepono, kagahapon.
Ang imbestigador midumili una sa pagluwat og pamahayag unsay tinuod nga gilalisan sa duha ka mga pulis.