SUPERBALITA CEBU

Diola: Duaw-niño alang sa balik-parokya

Mao diay

Binasi sa Isaias 11:1-10; Salmo 72; Taga-Roma 15:4-9; Mateo 3:1-12

GAHAPON Sabado sa alas-3 sa kadlawon, miduaw ang pilgrim statue ni Santo Niño de Cebu ngadto sa Archdiocesan Shrine ni San Roque sa Barangay Mambaling. Gibahin ang pundok sa parokya sa duha. Ang usa didto sa taytayan sa utlanan sa parokya. Ang lain sa atubangan sa parokya kuyog ang larawan ni San Roque ug Imaculada Conception. Ang tibuok katilingban ningmata alas 2 pa sa kadlawon aron sugaton ang Balaang Bata.

Sa hapit na moabot ang Sto. Niño, adunay usa ka “street theater” nga gipahigayon mahitungod sa kahimtang sa mga lumulopyo sa Mambaling. Tataw nga nanginahanglan kami og balik-parokya. Gani sa pag-ihap sa mga mosimba sa sulod sa tulo na ka Misa sa Domingo, sa 32 ka libo nga mga Katoliko sa maong barangay, mga duha ka libo ug tunga ra ang mosimba. Asa man ang uban?

Sa sinugdanan sa pagpangalagad ni Jesus, ang nangandam sa iyang pag-abot mao si Juan nga Magbubunyag kansang mensahe mao: “Paghinulsol kamo, kay haduol na ang gingharian sa langit”. Nagpadayon si Juan sa iyang tawag sa paghinulsol: “Busa ipakita ninyo ang bunga sa tinuoray nga paghinulsol”. Gikinahanglan adunay paghinulsol usa makabunyag si Jesus “sa Espiritu Santo ug sa kalayo”. Kinsa man ang mga Juan nga Magbubunyag nga maoy moandam sa mga kasingkasing sa parokyano sa Mambaling alang sa pag-abot ni Jesus?

Sa plano sa Dios, bisan ang usa ka tuòd matuboan og salingsing, sumala pa ni propeta Isaias. Ang tuòd ni Jesse, amahan ni David, matuboan og kinabuhi. Sa ato pa, adunay bag-ong hari sa linya ni David. Ang espiritu sa Ginoo maoy mohimo niini kay siya ang mohatag sa mga hiyas ug gasa nga gikinahanglan, sama sa kinaadman, pagsabot o kaalam, kahadlok sa Ginoo, ug uban pa. Tungod niini, mapahamtang ang kalinaw diin ang “leopard” makigdulog sa gamay nga kanding.

Kining gitagna ni Isaias gisulat kini aron pagtudlo nato, nga pinaagi sa paglahutay ug dinasig sa mga kasulatan, makabaton kita og paglaum, sumala ni San Pablo sa iyang sulat ngadto sa mga taga-Roma. Dinasig sa kasulatan, gidawat pod nato ang mga Juan nga Magbubunyag nga mituman sa gitagna ni propeta Isaias nga nagkanayon: “Andama ninyo ang dalan sa Ginoo, tul-ira ang iyang mga agianan”.

Matag usa kanato mahimong Juan nga Magbubunyag. Puy-an lamang sa ginikanan ang iyang responsibilidad ngadto sa iyang mga anak. Pahinumdoman ang mga batan-on sa mga hiyas nga kinaraan nga dili angay kalimtan, sama sa paghatag og katahoran. Ayohon lamang pagtudlo sa mga magtutudlo ang mga estudyante aron magpuyo sila og ligdong nga kinabuhi. Pahinumdoman lamang sa mga maninoy o maninay ang ilang mga kinugos sa pagtulon-ang Kristohanon. Ayohon lang og han-ay sa mga katekista ang ilang “lesson plans” ug mogamit og mga bag-ong pamaagi sa pagtudlo sa mga bata.

Unsa may atong mahimo sa atong mga nagkadaiyang parokya aron mobalik ang mga parokyano nga walay simbasimba?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph