NINGPADAYAG sa ilang kabalaka ug pagpanagana ang mga barangay kapitan sa Dakbayan sa Mandaue sa pagpatuman sa ilang road clearing. Dunay nipadayag sa kabalaka nga di mapatuman sa barangay kay familiar ra sa apektadong mga lumolupyo ang mopatuman niini.
Duna say niingon nga risgo sa kinabuhi sa mga mopatuman kon dunay mosukol nga lumolupyo.
Apan niingon si Mayor Jonas Cortes nga kinahanglan tumanon ang mando ni Presidente Rodrigo Duterte. Nakasabot siya sa kabalaka sa mga kapitan kay basin di na unya sila botaran sa umaabot nga piniliay kay maglagot ang mga tawo nga maigo.
Matod ni Cortes nga gikinahanglan ang political will kay kon wa niini ang pinili nga mga opisyal, maayo pag mangundang sila sa pulitika.
Sakto kaayo si Cortes sa iyang pamahayag. Gikinahanglan sa mga opisyal ang political will aron masinati ug makab-ot sa nasod ang dugay nang gidamgo nga kausaban. Di kini makab-ot kon ang mga nangatungdanan way political will sa pagpatuman sa balaud kay mahadlok nga mangasuko ang mga apektado.
Apan sa pagpatuman niini, gikinahanglan usab nga motanyag og alternatibong panginabuhi sa mga apektado. Busa, gikinanglan usab ang pagplano sa pagpatuman niini. Di kay abugon lang sila nga sama og mga iro. Gikinahanglan nga mo-adjust usab sila sa mga kausaban.
Ang lokal nga kagamhanan kinahanglan usab nga mopasabot sa mga maigo sa clearing operation nga gikinahanglan kini kaayo. Di lang kay kini alang sa kaayuhan sa kinabag-an, mao ra usab kini ang usa sa mga paagi nga makab-ot ang kalambuan.
Unsaon man sab gud, sud sa dugay nga panahon, tungod sa political accomodation ug kakuwang sa political will, ang sayop nga mga buhat gipasagdan hangtod nga alang niadtong mga naghimo, sakto sila bisan sayop kay nakalapas sa balaud ug nakahasol sa publiko.