GITUMBOK nga drug queen uban sa iyang duha ka kunsabong babaye nasikop,nakuhaag dul-an sa P500,000 nga balor sa drugas mga alas alas 2:10 sa kaadlawon sa Biyernes, Disyembre 6, 2019 sa Purok Tubigan, Brgy. Jubay, lungsod sa Liloan.
Si Charina Melgar, 52, alias “Tata”, nagpuyo sa nahisgutang lugar ug high value targets (HVT), nasikop uban nilang Maria Cleo Ano-os, 35, katabang, taga Brgy. Poblacion, Liloan, ug Katherine Melgar Pascual, taga Bgry. Jubay Liloan.
Si Major Danilo Colipano, hepe sa Liloan Police station nga nahinabi sa Superbalita Cebu nagkanayon nga sila si Melgar ug mga kauban ilang gipalitag usa ka putos nga shabu nga mobalor og P1,000.
Atol sa transaction, nakuhaan pa sa ilang possession og usa ka large nga putos, unom ka medium nga putos, unom ka gagmay nga putos nga ang tanan motimbang o 60 gramos nga mobalor og P408,000 base sa Dangerous Drugs Board (DDB) value.
Sa laing managlahing mga buy-bust operation sa Dakbayan sa Sugbo sa mga anti-drug unit sa kapulisan, siyam ka mga tawo nadakpan sa Biyernes sa gabii.
Moabot og kapin P300,000 nga kadtidad sa gituohang shabu ang nasakmit.
Duha ang nadakpan sa mga operatiba sa Provincial Intelligence Branch (PIB) sa Cebu Police Provincial Office sa usa ka lodging house sa dan Leon Kilat, Barangay Kalubihan, Siyudad sa Sugbo.
Si Police Lt. Col. Marlu Conag maoy nangu sa buy-bust nga niresulta sa pagkasikop sa ilang target lakip na ang usa ka mabdos nga naabtan pa nga nagbahig sa shabu nga bag-o pa lang kinumpra sa Sityo Bato, Barangay Ermita.
Giila ni Conag ang mga suspek nga sila si Joanna Delima Saludar, alyas Joan Delima, 30, ug Belinda Montes, hingkod, mabdos. Ang duha dinha na nagpuyo sa lodging house nga ilang giabangan.
Moabot sa kapin P80,000 ang nasakmit nga shabu gikan kang Saludar samtang si Montes maoy naaktohan sa mga operatiba nga nagbahig pa sa shabu nga maoy ipang baligya og P200 matag pakete.
Gitumbok usab nga si Saludar ang tinubdan sa shabu sa mga boring sa dan Leon Kilat ug kasikbit.
“Actually kana si Saludar nahibaloan namo nga magbugaw bugaw pud na siya aron kunohay dili mahibaloan ang iyang pagpamaligya gyud,pero og naay mangita nga kustomer og shabu, ang ilang babaye nga partner maoy modagan ngadto kang Saludar para mopalit,”matod ni Conag.
Si Saludar niangkon nga bag-o lang siya gihatdan ug iya lang sa unang gibayran og P10,000 ang shabu samtang si Montes nga maoy tigbahig nangyawat nga mahatagan og P500.
Sa laing buy-bust, moabot sa P170,000 ang nasakmit sa duha ka mga lalake nga gi buy-bust sa Drug Enforcement Unit sa Labangon Police.
Ang mga dinakpan giilang sila si Reynato Trazuna 37, taga Sityo Cogon, Barangay Pardo ug Nineve Bolluna ,39,lumolupyo sa Barangay Bulacao, Dakbayan sa Talisay.
Gihulagway ni Police Capt. Jonathan Dela Cerna nga HVT sa ilang estasyon si Trazuna.
Laing duha pa ang nasikop sa Sityo Tuburan, Barangay Punta Princessa nga sila si Joseph Diniay, 28, ug Bernardo Taboada, 23, taga dan Salvador ning siyudad.
Nasakmit gikan kanila ang 5 gramos nga shabu.
Samtang sila si Rolando Gika ug Dodong, 16 , nadakpan sa Philippine Drug Enforcement Agency (PDEA) 7, nasakmitan og pipila ka mga pakete sa shabu ug paraphernalia.
Lain pang tulo nadakpan nga mao sila si Renante Roche, 27, ug Jose Ebrada 22, taga Barangay Suba ug Corazon Avila, 55, taga Barangay Punta Princesa.
Nasikop sila sa mga sakop sa City Drug Enforcement Unit sa Cebu City Police Office.
Ang buy-bust gipangulohan ni PLt. Col. Frankie Jingle Lugo,pangu sa CDEU,CCPO.
Nasakmit ang kapin sa P50,000 nga balor sa gituoang shabu gikan kang Roche ug Ebrada samtang si Avila napalitan usab og usa ka pakete sa shabu.
Katapusan nga nadakpan si Henry Casipong, 35, usa ka estudyante sa kursong Marine Engineering sa usa ka tunghaan sa Dakbayan.
Mandaue
Unom ka lalake nakuhaan og mga pakete sa shabu ug marijuana sa checkpoint sa Lopez Jaena st., Dakbayan sa Mandaue sa gabii sa Biyernes, Disyembre 6, 2019.
Ang unom mao silang Crispin Gabato, 37; Mark Lim, 36; Janmar Opura, 24; Marlon Jimenez, 25; Renier Sortones, 27; ug si John Mendoza, 18. Nadakpan sila sa checkpoint nga gipahigayon sa Mandaue City Police Office (MCPO) Station 2.
Ang kinatibuk-ang nakuha sa unom mao ang 17 ka gagamayng pakete sa gituohang shabu, usa ka paketeng marijuana nga nikabat padung unom ka gramos nga nagkantidad og P24,000.
Si PSSgt. Ernesto Rivera, sa MCPO 2, niingon nga ang unom nadakpan sa managlahing oras. (GPL, BTT, KFD)